Hpyen koi yen lakawn lanawn gawdin shingjawng kanawn mazum lamang galaw
KBC Ramma Magam Dap kawn woi awn let, hpyen koi yen lakawn lanawn gawdin shingjawng kanawn mazum lamang galaw nga ai lam chye lu ai.
Mung masa lam amyu myu a majaw, hpyen gan koi yen taw nga ai nawku hpung shagu de na ramma ni hpe lakawn lanawn ai gawdin shingjawng kanawn mazum lamang hpe, Waimaw Ginwang, Nawng Hkying buga hpung kaw March shata 26 ya shani kawn, galaw nga ai lam chye lu ai.
Lamang galaw ai a yaw shada lam hpe KBC Ramma Hpa-awn Sara Sabaw Naw Din shatsam mungga shaga ai hta “Anhte nawku hpung nbung tim, gan koi yen nga ai ten hta hpaji tam ai lam, magam bungli shachyen shaja ai lam shagu hta law law hkrum, law law jahta, law law hkrum jang hkrum wa (Unity) byin wa ai hte lam shagu hta nsam, nsen langai hte lahkrip ra ra shawnglam de rau sa wa na matu yaw shada let galaw ai re” nga nna tsun ai.
Hpyen koi yen lakawn lanawn gawdin shingjawng lamang hta Nawng Hkying, Labang Mungra Buga, Nawng Kyi Buga, Jamga Buga, Waimaw Ginwang kata na buga nkau mi, LBC camp, RC camp hte Nawng Hkying makau mayan kaw gan shanu nga ai camp shagu de na ramma ni shang lawm ai re lam chye lu ai.
Ndai ramma ni gaw, Sama Ginwang, Waimaw Ginwang kata na rai nna, mung masa hpyen masa lam amyu myu a majaw, tinang shimlum dum ai shara ni hta gan koi yen nga ai ni re hpe matut chye lu ai.
