Hpyen Majan hpe ninghkap ai, Mungshawa n-gun madun akyuhpyi lamang galaw
Wunpawng Amyu sha Mungbawng Rapdaw ( WMR ) kaw nna woi awn nhtawm Myitkyina, Shatapru manau Wang hta September praw 3 ya shani Hpyen majan hpe ninghkap ai mungshawa n-gun madun akyuhpyi hpawng galaw ai lam chye lu ai.
Mungshawa N-gun Madun ninghkap hpawng a yaw shada ai lam gaw Tsaban 21 Panglung Zuphpawng galaw nga ai ten ladaw hta majan hpe dawm shazim kau nhtawm simsa lam hpe gawgap sa wa lu na matu mungshawa ni kawn ra sharawng ai lam, madun ai re hpe
chye lu ai.
Lamang hpe woi awn ai Slg. Lung Jung Tu Raw tsun ai hta Mungshawa jadip jahpang ahkang aya lu ai shani du hkra mungshawa ninggun hpungtun hte nhkring nsa lahkrip ra ra mungdan magam bungli hta tsap sa wa na lam chye lu ai.
Mungshawa N-gun madun akyuhpyi hpawng hta Amyu shayi hpung ni hte Shingni hpung ni kawn du sa wa ai mungshawa kanu kawa ni hpe lamang a yaw shada ai lam hte n-gun jaw mungga shaga ai lam, Makam masham hpung woi Sara kaba ni kaw na mung, awmdawm mungdan simsa lam lu na matu akyu jawm hpyi ai lam chye lu ai.
Myitkyina Shatapru manau wang hta galaw ai Hpyen majan hpe ninghkap ai shawa n-gun madun akyuhpyi hpawng lamang de shawa n gun 20,000 jan sa du shang lawm ai lam na chye lu ai.
Bai nna, Danai muklum kata hta mung, jahpawt hkying 9:00am aten kaw nna shani hkying 11:00am aten du hkra Hpyen majan hpe ninghkap ai shawa n gun madun lam hkawm lamang hpe mungshawa marai 800 jan shang lawm nhtawm galaw ai lam chye lu ai.
