Hpyen modo (5) hte lung wa ai gumshem Myen hpyen hpung ni hpe KIA ni hkap gap
KIA Masat (9) Dap Ba, Masat (26) Dap Dung ginra de hpyen modo (5) hte htu lung wa ai, gumshem Myen hpyen hpung ni hpe December shata 16 ya jahpawt hkying 6:30am aten hta Na Mawn hte Hupin lapran kaw KIA ni hkap gap gasat ai lam na chye lu ai.
KIA ni hkap gap gasat dat ai hpang, gumshem Myen hpyen ni makau grup yin shara ni de sinat kaji kaba hte hkrup mara gap bun ai lam chye lu ai.
KIA Masat (44) Dap Dung ginra, Hpakant lam Kamaing Htoi San Yang mare kata hta mung, December shata 16 ya shana hkying 7:30pm aten daram hta mungshawa ni a dum nta nkau hkan, gumshem Myen hpyen hte Pyi Tu Tsit pawng hpawm hpyen la ni sawk jep hkawm nga ai lam, ginra shisawk ni kaw na chye lu ai.
Mungmyit Sinli Ga (Kachin Sub-state), KIA Masat (6) Dap Ba, Masat (36) Dap Dung ginra, Kokang MNDAA ni nga ai Nawng Hkam Bum maga de, December shata 16 ya shana maga hkying 5:58pm aten hta gumshem Myen hpyen dap ni Helicopter nbungli 2 hte wa htim gap ai lam nga ai rai nna, laknak kaba ni hte mung ding yang gap bun nga ai lam, shawng lam na lit nga ai salang langai shana wa ai re.
