Hpyen n gun jat lung wa ai, gumshem Myen hpyen dap hpe KIA ni hkap gap gasat
KIA Masat (5) Da Ba, Masat (25) Dap Nawng Dap Dung ginra hta July shata 11 ya shana daw hkying 4:00pm jan aten daram kaw, Manmaw maga na lung wa ai gumshem Myen hpyen dap hpe KIA ni hkap gap gasat ai lam chye lu ai.
Gumshem Myen hpyen dap ni gaw, Manmaw maga kawn hpyen modo 3 hte Nam San Yang hpyen man de htu lung wa ai hpe KIA ni, Numlang hte U Htang Yang lapran kaw bawm hte hkap gap gasat ai hta modo 1 hkaraw de galau mat wa ai lam, shawng lam shiga lawk kaw na chye lu ai.
KIA Masat (19) Dap Nawng Dap Dung ginra, Dawhpum Yang makau kaw mung, July shata 11 ya shana hkying 7:30pm aten daram hta gumshem Myen hpyen dap hte KIA hpyen hpung ni gasat poi matut byin ai lam chye lu ai.
Ya aten gumshem Myen hpyen dap ni, ginjaw ginra de hpyen n gun matut jat nga ding yang re majaw, gasat gala majan laja lana byin wa na hpe mungshawa ni hkrit tsang nga ai lam, buga masha ni tsun ai kaw na chye lu ai.
