Hpyen shamu shamawt htu lung wa ai gumshem Myen hpyen hpung ni hpe KIA ni hkap gap gasat
Daw Hpum Yang hpyen man, Hka La Yang kaw, December shata 13 ya shani ka-ang hkying 12:30pm aten kaw nna, hkying 1:00pm aten daram du hkra, gumshem Myen hpung hte Pyi Tu Tsit pawng hpawm hpyen hpung ni hpe KIA pawng hpawm hpyen hpung ni hkap gasat ai kawn gasat poi byin ai lam chye lu ai.
Gumshem Myen Hpyen, Dapnu (88) kata na hpyen hpung ni, Hkangkai Bum kaw nga ai Hk.L.Y (142) dap ni hte Shwe Min Pyi Tu Tsit pawng hpawm hpyen n-gun (100) daram gaw, KIO ginjaw ginra, Bumre, Hka Ya Bum kaw nga ai Tai Myen hpyen ni hpe hpyen lang arung arai hte malu masha wa htaw sa na modo hpung ni hpe shimlam la ya ai ni re lam, shawng lam na lit nga ai salang langai tsun dan ai.
Matut nna, dai na maga hkying 3:00pm aten hta Hka La Yang mayan hta sha, numdaw kalang bai gasat poi byin ai lam nga ai. Gasat poi byin ai maga de, Bumre Hka Ya Bum kaw nga ai gumshem Myen hpyen ni laknak kaba gap bun ai lam mung nga ai re.
Hkang Kai Bum kaw nga ai Hk.L.Y (142) dap hte Daw Hpum Yang laika sharin jawng kaw nga ai, gumshem Myen hpyen ni mung KIA Masat (25) Dap Dung ginra de, laknak kaba gap shalun bun ai lam chye lu ai.
December shata 13 ya shani hta sha, Jinghpaw Mung hte Sagaing jarit, Indaw ginwang Mawlu gumshem Myen Hpyen Balik Dap hpe KIA, PDF pawng hpawm hpyen hpung ni sa htim gasat padang dip zing la lu ai lam, ginra shiga lawk kaw na chye lu ai.
Ya aten hta Jinghpaw Mung, Mungmyit Sinli Ga, Sagaing ginra, Rakhine Mung, Karin, Karin Ni Mung hte Hkang Mung ginra ni hta gumshem Myen hpyen dap hte Rawt Malang hpyen hpung ni hpyen masa shaja hkat nga ai sha n-ga, shani shagu ngu na gasat poi byin nga ai re.
Gumshem Myen hpyen dap ni gaw, mungshawa ni nga mare kata de, laknak kaba gap bun ai lam nbungli bawm jahkrat bun ai lam hte mungshawa ni a dum nta ni hpe wan nat jahten ai majaw, mungshawa ni si hkala hkrum nga ai sha n-ga, nkau gaw tinang shimlum dum ai shara nam maling de koi yen nhtawm, nkau gaw mare kaba de hpyen koi yen ai hta nkau gaw grai yak hkak hkrum nga ai lam na chye lu ai.
