Photo Credit; Fb
Myitkyina, Palana (Saint Joseph Camp) hpyen yen dabang hta January shata praw 9 ya shani COVID-19 ana kap ai ramma la kasha langai hpe jep mu ai lam chye lu ai.
“January shata praw 7 ya shani camp kaw nna, shi Kawa yi galaw ai Mashi Yang de lung wa ai, Mile 17 Shanglawt shagyit (Gate) Check point kaw mu jep ai re. Shi gaw camp kaw nau nnga ai yi de lung dat yu wa dat rai nga ai re majaw kadai kaw na kap la ai re ma n chye lu ai” nga nna Palana Padauk Myaing Saint Joseph Camp na Ningtau Camp Up Salang Mali Kumrin tsun ai.
Palana (Saint Joseph Camp) hta hpyen yen ni nga ai shara hpe masat 1, 2 nga shara masat tawn da ai hta, ana kap hkrum ai wa gaw masat 2 shara na asak 15 ning ramma re. Masat 2 shara hpe ya aten Lockdown jahkrat da ai lam Ningtau Camp Up wa matut tsun ai.
Ndai lawng lam hte seng nna mung, Ginjaw COVID-19 Ana Zinli Makawp Ninghkap Komiti Amu Madu, Du Kaba Lahpai Hing Wawm tsun ai hta “Dingdung daw mile 17 Zup Mai Yang kaw byin ai lam re. January shara praw 8 ya hte praw 9 ya lahkawng ya jep yang positive byin ai majaw January shata 10 ya shana maga hkying 5:30pm aten Myitkyina tsi rung de htaw mat sai” nga nna tsun ai.
Ana kap hkrum ai masha hpe ya ten Myitkyina tsi rung hta tsi tsi hkam la nga sai, nta masha ni hte shi hte hkrum shaga ai manaw manang ni hpe mung ana jep nhtawm, Quarantine bang ra na lam, shi hte lung wa ai manang marai 3 hpe mung Zup Mai Yang Check point kaw gara de nhkawm shangun ai lak san naw tawn da ai lam, Du Kaba matut tsun ai.
Myitkyina ginra kaw hpyen yen dabang law law nga ai hta Palana (Saint Joseph Camp) kaw COVID-19 ana shawng ningnan jep mu ai lam chye lu ai.
