Hpyen yen hkrumzup nawku hpawng galaw
Laiza Buga Hkalup Hpung kawn woi awn nhtawm, hpyen majan a majaw hpyen yen hkrum ai, Laiza buga kata na nawku hpung masha ni a hkrumzup nawku hpawng hpe January shata 25 ya shani Rev. Maran Naw Masat Htingnu kaw galaw ai lam chye lu ai.
Ya na zawn buga masha ni a hkrumzup hpawng galaw ai lam gaw tinang buga ginra ni hpe tawn kau da nhtawm, kaga buga de hpyen koi yen mat ai laiza buga nawku hpung kata na mare kahtawng nkau mi rai nga ai Dunghkung, Laja Yang, Lawa Yang hte Sha-it Yang hkan na nawku hpung masha ni, shaning na na nhkrum mat ai hpung masha ni bai hkrum zup lu na matu, shada n gun la ai hte zinlum lu na matu Karai Kasang a man de rau sha hkrumzup let hpawng de lu na matu yaw shada let galaw ai re lam Rev. Sumlut Gun Seng tsun ai.
Laiza Buga Hkalup Hpung kata mare kahtawng 10 nga ai rai nna, hkrum zup hpawng hta sa du shang lawm ai nawku hpung masha ni yawng marai 100 jan re hte lai wa sai 2018 ning hta mung ya na zawn hpyen yen mat ai buga hpung masha ni a hkrumzup hpawng hpe Ja Htu Kawng mare kaw galaw lai wa sai re lam chye lu ai.
