Hpyen yen IDPs na jawngma ni hpe China Danxun Education Foundation kaw nna ra ai arung arai ni garum jaw

China Danxun Education Foundation Myanmar Jinyingge Investment Group ni kawn Woichyai IDPs lawu tsang jawng kaw September 26 ya shani garum ningtum sa jaw ai lam chye lu ai.

Woichyai hpyen yen lawu tsang jawng na jawngma ni yawng marai 207 hte Mung Seng Yang jawng na lawu tsang daw jawngma ni hpe jawng lang rungrai ni rai nga ai Nhpye, Jawng, Hka bu, Ballpan sumbu hte ginsup rai ni garum ya ai re lam Jawng up Saranum kaba Saga Htu Ra tsun ai.

Garum ningtum hpung ni gaw Miwa Gumsan mungdan kaw na lauban masum pawng nna nambat langai lang sa garum ning tum jaw ai rai nna, Woichyai hpyen yen lawu tsang jawng hte Mung Seng Yang jawng na lawu tsang daw jawngma ni hpe sha garum ya ai re lam chye lu ai.

Ndai kalang gaw jawngma ni hpe jawng lang rung rai ni hpe garum ya ai rai nna, hpang kalang gaw jawng gap ya ai zawn re ni hpe matut nna garum jaw ya na re lam chye lu ai.