Hpyen yen ladaw 9 ning hpring lamang hpe online service hku galaw
Wunpawng Amyusha Mungbawng Rapdaw (WMR) kawn woi awn nhtawm, hpyen yen ladaw 9 ning hpring lamang hpe WMR rung kaw June shata praw 9 ya jahpawt hkying 9:00am aten hta online service hku nna lamang hpe galaw ai lam chye lu ai.
Dai ni na online lamang hta nawku daw jau lamang, hkalum ga shaga ai lam, IDPs byin wa ai labau hpe tsun ai lam ni galaw ai lam, WMR Ningtau Amu Madu, WMR kaw na tsun ahkang lu Sara Nhkum Tang Gun tsun dan ai.
“Saranum Hpungtau Gawlu Htu Lum hku nna hpawng hpaw akyu hpyi ai, WMR Ningbaw hku nna hkalum mungga shaga ai, Rev. Dr. Hkalam Samson kaw nna hpyen yen byin wa ai labau hpe tsun ya ai, Bishop John Gumgyi Zau Li hku nna Karai Kasang Mungga hpe htawn tsun ya ai, AG nawku hpung kaw na Rev. Dr. Dahkum David kaw nna hkum tsup akyu hpyi ya ai, Wa Saradaw Francis Daw Tang shaman ai hte dai ni na 9 ning hpring nawku dawjau lamang hpe galaw la lu sai re” nga nna tsun ai.
Hpyen koi yen ai hkrun lam gaw grai galu wa sai, matut na shawng lam hta gara hku naw nga ra na mahtai nlu shi ai re, ndai gaw mung masa lam hte simsa lam matut taw ai amu rai taw ai re majaw, hpyen koi yen nga ai mungshawa ni kaw nna grai myitru ai lam ni nga ai raitim, Wunpawng Amyusha Mungbawng Rapdaw, KHCC, JST hte Makam Masham Nawku hpung ni kaw nna IDPs ni hte maren hkam sha ai, IDPs ni bai wa lu hkra IDPs ni a shawng lam hpe galoi mung myit nga ai lam, grau nna Karai Kasang kaw akyu hpyi let IDPs ni a shawng lam hpe myit hkrum myit ra hte ladat tam nna jawm galaw sa wa ga nga nna Sara Nhkum Tang Gun matut tsun ai.
2011 Ning, June Shata praw (9) ya shani kaw na bai byin hpang ai htim gasat majan a majaw, dinghku majan byin wa nna, hpyen yen (IDPs) mung shawa ni majan hpe hprawng yen ra mat wa ai gaw, dai ning, 2020 ning June Shata hta, (9) ning hpring sai re.
