Hpyen yen mungmasha marai 2 bawm kabye kapaw la nna, marai (1) asak si sum (1) hkala hkrum
Man Je, Madang Yang makau kaw, December shata 17 ya shana hkying 7:00pm aten daram hta gumshem Myen hpyen dap Hk.M.Y (602) dap ni hkam da ai bawm kabye kapaw la nna, hpyen yen mungmasha marai langai asak si sum, marai (1) hkala hkrum ai lam, buga na salang langai shana wa ai.
Asak si sum mat ai wa gaw, Man Je hpyen yen na Salang Hpaumi Zau Lai asak 30 ning, Shadang Hpaumi Seng Lar asak 16 ning gaw, magyi lahkawng maga, kan hte ta lahpum kaw hkra hkala ai rai nna, Manmaw Myin Htawng Hpyen Yen Camp kaw nga ai re lam, salang wa tsun ai.
Myen hpyen dap ni shanhte hkam da ai bawm ngoi wa ai majaw, hpang jahpawt sa yu yang, hkala hkrum ai wa taw nga ai hpe mu nna hpyen dap de woi mat nhtawm, san jep ai lam ni galaw ai hpe chye lu ai.
Bawm kabye la hkrum ai yan gaw, nam shan tam hkawm ai ten, Myen hpyen dap ni hkam da ai bawm kapaw la ai re. Asak si hkrum mat ai salang wa gaw shinggan de, galaw lu galaw sha na matu Man Je, Kawng Ra lawk na salang wa a madi shadaw laika lawm taw ai majaw, Myen hpyen dap kaw na bai sagawn ya nna, Shadang Seng Lar hpe gaw December shata 18 ya shana maga de Myen hpyen dap ni mare masha ni hpe ap ya ai lam galaw ai nga salang wa tsun ai.
Shadang Seng Lar gaw ya aten Manmaw mungshawa tsi rung kaw tsi tsi hkam la nga sai rai nna, grai tsang ra ai madang nre lam chye lu ai. Asak si sum mat ai wa a moi mang hpe 19 ya shani dai shara kaw makoi mayang kau sai rai nna, December shata 23 ya shani hta dum nta kaw myit dum akyu hpyi hpawng hpe galaw na re lam chye lu ai.
