Hpyen yen tsin yam hkrum ai ( 8 ) ning hpring masat n-gun la akyu hpyi hpawng galaw
Hpyen yen tsin yam hkrum ai ( 8 ) ning hpring masat n-gun la akyu hpyi hpawng hpe Myitkyina Muklum, Shatapru manau wang kaw June shata 8 ya jahpawt hkying 9:30am aten hta galaw ai lam chye lu ai.
“WMR ( Wunpawng Amyusha Mungbawng Rapdaw ) ni kawn kanu kawa dawhpum dawnu tai nna tatut magam bungli hkrang shapraw ai hta gaw Myitkyina ginra nga ai Wunpawng ramma ni hte hpyen yen ramma ni hku nna jawm galaw ai lamang re. Yaw shada ai lam gaw anhte hpyen yen kanu kawa ni hpaji lam, sut masa lam, lam yan shagu hta yak hkak hkrum nga ai grai law ai re majaw ndai zawn re ni hpe seng ang ai, lit nga ai ni hku nna tang du hkra garum shing tau ya lu na matu hte hpyen yen ni nta wa lam hta galoi ten gara hku hpyen bai du na nchye ai re majaw majoi wa ai hku nre sha shimlum simsa ai hte shinggyim ahkaw ahkang hte hpring ai hku seng ang ai asuya ni hku nna hkrang shapraw ya lu na matu yaw shada let galaw ai re.” nga nna shabyin shatai komiti kaw na Sara Lasha Pawlu tsun ai.
Ndai magam bungli gaw anhte nkam galaw sai raitim galoi mung n gun la akyu hpyi hpawng galaw lu ai, anhte nhtum nmat ai karai chyeju hte myit hkrum mang rum gahkyin gumdin wa lu ai hta karai kasang kaw n gun la chyeju shakawn ai akyu hpyi hpawng lamang re. Anhte grau nna myit hkrum kahkyin gumdin wa lu jang she anhte wunpawng sha ni a shawnglam galai shai ai lam byin wa na re nga nna sara shi a mu mada lam hpe matut tsun ai.
Akyu kyu hpyi hpawng hta hpyen yen tsin yam hkrum nga ai aten na hkam sha ai lam hpe sakse hkam ai lam, hpyen yen ma ni a karate ginsup ai lam , yu ngwi pinra lamang, gamung naura hte sumla madun gawk ni galaw ai lam chye lu ai.
N gun la kyu hpyi hpawng hta Waimaw, Myitkyina hkan na hpyen yen mungshawa ni, Myitkyina Muklum kata kaw nga ai mungshawa kanu kawa myitsu salang ni hte nawku hpung na Jau, Hpung up ni yawng marai 1000 mi jan sa du shang lawm ai lam chye lu ai.
Photo: Zahkung Du Li
