Htan Hpa Bum kaw KIA hte Myen hpyen hpung ni numdaw 2 lang gasat gala majan byin
Mungmyit Sinli Ga (Kachin Sub-state) KIA Dap Ba 6, Dap Dung 9 ginra, Htan Hpa Bum kaw June shata praw 6 ya shani ka-ang hkying 12:30pm aten hta kalang shana hkying 7:50pm aten hta kalang numdaw 2 lang KIA hpyen hpung ni hte Myen Hpyen Dap, Dapnu 99 kata na hpyen hpung ni gasat gala majan byin ai lam, shawng lam na salang langai shiga jaw wa ai.
Myen hpyen hpung ni gaw, KIA ni shara jahkrat nga ai Htan Hpa Bum de htu shadut lung wa ai kaw gasat poi byin ai re. June shata praw 7 dai hpawt hkying 6:00am aten hta mung Myen hpyen hpung ni KIA ni nga ai shara de matut htu lung wa ai hta KIA ni hkam tawn ai bawm kabye kapaw la ma ai, dai hpang Myen hpyen ni gaw sinat kaji kaba hte hkrup mara gap dumbre nga ai lam, salang wa tsun ai.
Ya na hku sha rai yang majan gaw, matut byin wa mai ai nga nna, salang wa matut tsun ai.
Gasat gala majan byin nga ai shara de, Myen Hpyen Dap, Dapnu 88 hte Dapnu 99 na pawnghpawm hpyen hpung ni gaw, hpyen modo kaba 15, modo kaji 5 yawng modo 20 bai jat lung wa ai lam, ginra shi sawk ni kawn chye lu ai.
June shata praw 4 ya shani hta mung, KIA Dap Ba 10, Dap Dung 17 ginra, Na Leng grup yin shamu shamawt nga ai, Myen Hpyen Dap Masat Hk.L.Y (79) dap na hpyen n gun 70 daram hte KIA hpyen hpung ni, Bang Sha Ji makau kaw gasat gala majan byin ai lam na chye lu ai.
