Htawng dam nhtoi 15 ya jahkrat hkrum ai Shayi Seng Nu Pan hkyuk htawng kawn lawt pru wa
Hpyen yen mungshawa ni a hkamsha lam hpe lam ntsa kaw shingni hkrang shala ( street performance ) woi galaw ai majaw Nyein Suzi pukma 19 hte tara jawat hkrum nna htawng dam nhtoi 15 ya jahkrat hkrum ai ramma 2 kaw na Shayi Seng Nu Pan gaw September 16 ya jahpawt hkying 6:00am aten hta Myitkyina Hkyuk htawng kawn lawt pru wa sai lam chye lu ai.
Shayi Seng Nu Pan shi a hkamsha lam hpe ya na zawn tsun ai. “Anhte gaw majan tsin yam hkrum ai 8 ning hpring ai hpe galaw ai sha re, Asuya hpe gumlang ai mung nre ai majaw anhte hku nna hkap la ai gaw ndai lam gaw mara nnga ai, shinggan kaw kaja ma byin taw ai anhte a hkam sha lam hpe galaw ai re majaw mara hku na nmu ai, raitim seng ang ai ni hku nna anhte hpe tara jahkrat da ai, anhte hku nna gaw mara nlu ai majaw gumhpraw tsep kawp nlu jaw ai, gumhpraw njaw ai majaw shanhte hku nna htawng dam nhtoi 15 ya jahkrat da ai re. Daihpawt chyawm gaw ngai le wa sai raitim Sara Pawlu gaw tara agyi hpe sumri di taw ai joi jang jaw ai majaw htawng dam shata 3 bai kahtap jahkrat dat ai re. Shi galaw ai gaw jaw ai, tara agyi gaw njaw n-ang ai hku nna tara jahkrat ai re majaw joi jang hpe jaw ai hpe ngai hku nna gaw hkrak tup madi shadaw ai re” nga nna tsun ai.
Htawng kata kaw mung grai yak jam jau taw ma ai re. Ntara ai hku nna tara jawat da ai ni, nkau gaw gumhpraw shada ai zawn re ni, mayun kumhpa sha ai zawn re ni, Upadi hpe အလြဲသံုးစား galaw ai ni, အာဏာအလြဲသံုးစား galaw ai ni grai law hkra nga taw ai, gaja ma grai yak hkak jam jau taw ai. Ndai zawn re anhte mungdan kata kaw ndai hpe ahkyak la nna mang hkang ni hpe shaprai kau lu hkra lu galaw ai asuya shing nrai seng ang ai masha langai ngai gadai mung nnga shi ai. Gaja nan anhte mungdan hpe tsawra ai rai yang gaw ndai zawn n gaja ai hpe gaw gabai kau ra na re. Ndai Myen mung a tara hpe atsawm sha bai galaw na matu gaw Myone tara rung kaw nna Pyi HtawngSu tara rung du hkra galai shai ra na, masha mung galai shai ra na re. Ndai zawn sha rai yang gaw mara nnga ai mungshawa ni grau machyi hkrum hkra nga ai hpe mu mada ai re majaw ndai zawn re hpe gaw galai shai ra na ngu ai hpe mu mada ai re nga nna Shayi Seng Nu Pan shi a ningmu hpe matut tsun ai.
Ya na zawn htawng sharen da ai raitim ndai hpe hkrit ti na n galaw mat ai nre sha teng man ai lam hta gwi gwi tsap nna matut na galaw mat na rai nna, Hkum hkrang hpe sha htawng sharen da ai raitim anhte a makam masham, anhte a myit da ai lam ni hpe gaw gadai mung htawng lu sharen na nre majaw galoi ma asum njaw ai sha tara rap ra lam a matu gwi gwi shawng de tsap sa wa re lam Shayi Seng Nu Pan tsun ai.
Shadang Pawlu hte Shayi Seng Nu Pan yan gaw June shata 9 ya shani Hpyen yen 8 ning hpring masat nhtoi hta hpyen yen mungshawa ni a hkamsha lam hpe lam ntsa shingni hkrang shala ( street performance ) woi galaw ai majaw Myen Balik Du Myin Thant Zaw kawn Nyein Suzi pukma 19 hte tara jawat da ai re. Shadang Pawlu hte Shayi Seng Nu Pan yan hpe September shata praw 2 ya shani, Myitkyina tara rung kawn htawng dam nhtoi 15 ya jahkrat ai rai nna, Shayi Seng Nu Pan gaw September shata 16 ya shani Myitkyina hkyuk htawng kawn lawt pru wa sai lam chye lu ai.
