Htoi Gender and Development Foundation ni kawn Covid-19 ana zinli hte seng ai ningmu jahpaw hkaw tsun lam galaw
Htoi Gender and Development Foundation ni kawn Waimaw hte Myitkyina hta nga ai hpyen yen mungshawa ni, Myitsone Hka madim a majaw htawt sit hkrum ai mare ni hte kaga mare ni hta Covid-19 ana zinli makawp ninghkap lu na matu, ningmu jahpaw hkaw tsun ai lam galaw ai re.
Covid-19 ana ninghkap ningmu jahpaw galaw ai hta tsi gat pung, lata kashin ntsin, n-gup magap (Mask) hte bawp tawng ni hpe mung garum jaw ai lam chye lu ai.
“Ningmu jahpaw ai lam hta ndai ana a majaw, Quarantine galaw nga ai aten, myit masin ana hte seng ai lam ni, Covid-19 ana hpe makawp ninghkap ai Mask hpe gara hku lang na ngu ai ladat ni, Asak kaba sai ni hta ana nkap hkra gara hku gawn lajang na ngu ai lam ni, masat da ai shara hta nga ai ten, myitdaw myithten ai nre sha, hkumhkrang shamu shamawt ai lam ni hpe galaw ya nna myit pyaw pyaw nga na matu tsun dan ai lam ni, lata kashin ladat hte seng ai laika pa ni garan ya ai” nga nna Htoi Gender Ningtau Amu Madu Waje Lu Seng tsun ai.
Ya na zawn galaw hpang ai gaw March shata ka-ang kaw nna hpang wa ai rai nna, April shata htum du hkra galaw na re. May shata praw kaw nna matut manoi Manmaw, Laiza, Mai Ja Yang hte kaga mare ni hta mung sa na matu masing nga ai lam, Saranum matut tsun ai.
Ningmu jahpaw ai hte arung arai garum ngut sai shara ni gaw, Myitkyina hte Waimaw hta nga ai Belehem Camp, Ziun Camp, Maliyang Camp, Manhkring Camp, Maina KBC Camp, Maina AG Camp ni hte kaga mare rai nga ai Awng Myin Tar, Maliyang, Hkam Bu hte Lung Ga Zup mare ni hta re. April shata 20 ya shani hta mung Chying Hkrang hte Npawn mare ni hta matut nna galaw sa wa na re lam chye lu ai.
