Huhpyet, Hpaudaw mare makau hkan, Myen hpyen hpung ni sinat kaji hte hkrup mara gap bun
Mungmyit Sinli Ga (Kachin-sub-State) KIA Dap Ba (6), Dap Dung (9) ginra, Huhpyet, Hpaudaw mare makau hkan October shata praw 5 ya shani hta Myen hpyen dap Dapnu 88 hte 99 kata na pwng hpawm hpyen hpung ni, sinat kaji hte hkrup mara gap bun nga ai lam na chye lu ai.
Ndai lam hte seng nna shawng lam na salang langai ya na zawn tsun dan ai.
“Shanhte ya na zawn sinat majoi gap ahprup ai majaw mungshawa ni hpe hkra wa na tsang ra ai, mungshawa ni gara de pi nmai sa grai myit tsang nga ga ai”
Dai ni na gaw, gasat gala majan byin ai lam kaga nnga ai raitim, Myen hpyen dap, Dapnu 88 hte 99 kata na ngu maram lu ai hpyen hpung ni gaw hpyen modo 30 daram hte hpyen n gun jat nga ai lam, ginra shi sawk ni shana wa ai.
Sinat laknak kaba hte gap ai lam gaw nlawm ai raitim, sinat kaji hte hkrup mara gap bumbraw nga ai lam chye lu ai.
Myen hpyen dap gaw October shata praw 1 ya shani kaw nna 30 ya shani du hkra, hpyen shamu mawt lam n galaw na matu ndau laika shapraw da ai raitim, October shata praw 3 ya shani kaw nna KIA Dap Dung (9) ginra hta gasat gala majan byin nga ai re.
