ICRC ni garum jaw ai arung rai ni hpe PCG kawn KIO COVID-19 Ana Zinli Makawp Ninghkap Komiti ni hpe ap ya ai lam galaw
Mai Sak Pa Mare komiti rung kaw, July shata 29 ya shana maga hkying 2:30pm aten kaw na hkying 3:30pm aten laman hta International Committee of the Red Cross (ICRC) ni kawn COVID-19 ana zinli makawp arung arai ni garum jaw dat ai hpe gawng malai hku nna, Peace-talk Creation Group (PCG) ni kawn, KIO COVID-19 Ana Zinli Makawp Ninghkap Komiti ni hpe ap ya ai lam galaw ai.
KIO Ningbaw Malai (II) Sara Kaba Sumlut Gam (COVID-19 Ana Zinli Makawp Ninghkap Komiti Ningbaw) kaw nna, hkalum ga hte chyeju dum ga hpe ya na zawn tsun ai.
“Dai ni gaw anhte a matu grai akyu rawng sai. Amyu hte Mungdan a matu grai manu dan ai ninghtoi rai sai. Ndai zawn ICRC ni garum jaw dat ai arung arai hpe hkrunlam hta grai yak hkak ai raitim, ya na zawn shara kaw du hkra sa jaw ai PCG hte garum jaw ai ICRC ni hpe grai chye ju dum ai” nga nna tsun ai.
Arung arai sa ap ai hte seng nna, Salang Lamai Gum Ja (PCG) tsun ai hta “Dai ni gaw ICRC ni du sa nna, COVID-19 ninghkap komiti ni hte rau hkrumzup let shaga ra na ten re. Shan hte hku nna mung grai sa du mayu ai raitim, Hpyen Dap ni hku nna ahkang njaw ai majaw, nlu sa du ai. Hpyen Dap kaw na ndai arung arai gaw, COVID-19 hte seng ai re majaw arung arai gaw mai sa sa ai raitim, ICRC ni gaw nmai sa ai, PCG ni sha mai sa ai nga, tsun wa ai majaw shanhte a gawng malai sa ap ya ai hku rai sai” nga nna tsun ai.
ICRC ni garum jaw dat ai arung arai yawng hpe htaw sa wa na matu Modaw hta baw tawn ai raitim, Myen Hpyen Dap ni gaw N-gu buk 200, Muka shabawn 500 hte Jawng 500 hpe gaw COVID hte n seng ai arung arai re nga nna jahkring kau ya ai lam chye lu ai.
Ginjaw COVID-19 Komiti ni kaw nna mung, ICRC ni hpe shagrau masat laika pa hte kumhpa hpe shagrau jaw ai.
Lai wa sai May shata hta mung ICRC ni hku nna, KIO Ginjaw COVID-19 Ana Zinli Makawp Ninghkap Komiti ni hpe Myen Gumhpraw kyats 430 (Sen Mali Tsa Sumshi) hpe garum jaw lai sai lam chye lu ai.
