IDPs camp na mungmasha marai 2 hpe hkauna pa kaw na Myen hpyen hpung ni rim woi mat

Sinpraw Ginwang Ginjaw, Ulang Pa Ginwang, Mali Pa Ninghtawn Munghkawng IDPs camp na mungmasha marai 2 hpe January 31 ya shani Hkapra hku hkauna pa yi wa kaw na Myen hpyen hpung ni rim woi mat ai lam, buga na salang langai shana wa ai kawn chye lu ai.

Rim hkrum ai yan gaw salang Hpaugan Yaw asak 60 ning jan hte shadang Dauje Naw San asak 29 ning yan re. Salang Hpaugan Yaw a hkauna yi wa kaw rawng nga yang Myen hpyen hpung ni sa rim woi mat ai re.

Seng ang ai salang ni hku nna gaw, Manje M.Y.K rung hte Balik rung de shiga jaw da sai hte salang yan hpe rim mat ai shara de sa tam yu na matu, Myen hpyen hpung ni ahkang njaw ai lam, rim hkrum ai yan gaw daini du hkra hpa nga shiga mung nna ai majaw, nta masha ni grai myit tsang nga ai lam, salang wa tsun ai.

Dai salang yan hpe rim woi mat ai gara hpyen dap ni re nchye ai raitim, dai ginra hta shamu shamawt nga ai hpyen hpung ni gaw, Dapnu ( 77 ) hte Dapnu ( 88 ) ni re lam, February praw 2 ya shani kaw nna gaw, Hkapra yang mare a sinpraw maga hte Jesawn maga nam de tsep kawp nshang na matu, Myen hpyen dap ni tsun matsun da ai lam chye lu ai.