ILas jawng yu hpawng galaw
Mai Ja Yang Muklum kaw hpaw sharin nga ai, Institute Of Liberal Arts And Sciences (ILas) jawng yu hpawng hpe April shata 23 ya shani ILas jawng wang kaw galaw la lu sai re.
Jawng yu hpang hta Du Kaba Maran Hkun Seng kaw nna shatsam mungga tsun ai hta
“Daini mungkan gaw minute second shagu hta ngai grau nang grau nga nna rawt jat galu kaba wa na matu shingjawng nga ai mungkan rai nga saga ai re, tsa ban 21 gaw prat shachyut shingjawng kashun nga ai jinghkri hta e anhte hkan pyau lawm nga lu na matu gaw machye machyang hpaji ahkyak dik rai nga ai” nga nna tsun ai.
Daini na jawng yu hpawng hta jawng yu sai jawngma yawng marai (133) rai nna, lakmak shagrau ai lam, ningtawn ai jawngma ni hpe laksan shagrau sha-a ai lam ni hpe galaw ai lam chye lu ai.
ILas jawng hta IEP ngu ai Intensive English Program hte Diploma in English hte Diploma in Liberal Arts ni hpe sharin ya nga ai rai nna, jawng hpe gaw laiwa sai 2001 ning kaw nna hpaw sharin wa ai re lam chye lu ai.
Daini na hpawng lamang hta Magam Dap Makan Dap hkan na magam gun ni, mungshawa jawngma kanu kawa ni hte hpung woi sara ni sa du shang lawm ai hte galaw la lu sai lam chye lu ai.
