International Day Of Happiness lamang galaw
Kachin IDPs Youth Komiti ni woi awn nna, International Day Of Happines lamang hpe Laiza Muklum, Sinpraw Majoi Gawknu kaw March shata 20 ya shani hkying 1:00pm aten kaw nna hkying 4:00pm aten du hkra galaw ai chye lu ai.
Dai ni na nhtoi gaw International Day Of Happiness nhtoi langai rai nna, ndai nhtoi hpe UN (United Nations) kaw na masat da ai re. Happines ngu ai gaw shinggyim masha nnan shangai wa ai kaw nna lu la ging ai ahkaw ahkang langai re ngu ai lam hpe IDPs ramma ni hpe mung chye shangun mayu ai majaw, ndai lamang galaw ai re lam, Kachin IDPs Youth Komiti a main komiti malawm Sara Nhkum La Nu tsun ai.
Lamang hta madung gaw International Day Of Happines hte seng ai lam tsun dan nna, IDPs Camp ramma ni a Debate, happiness hte seng ai lam hpe gara hku galaw sa wa na ngu ai hpe ga san, ga htai hte games gasup ai lamang ni lawm ai re hpe chye lu ai.
Kachin IDPs Youth Komiti hpe 2019 June shata 6 ya shani kaw nna jawm gawgap la nhtawm, International Day Of Happines hpawng lamang hpe daining shawng nnan lang galaw ai hta IDPs ramma ni hpe madung tawn nna galaw ai re hte aten masa hta hkan nna shaning shagu matut galaw sa wa na masing nga ai re hpe mung chye lu ai.
Hpawng lamang hta Je Yang Camp, Woi Chyai Camp hte Hpun Lum Yang Camp kaw na ramma ni yawng marai 100 jan sa du shang lawm ai lam chye lu ai.
