International Women’s Day hpawng galaw
Wunpawng Mungdan Shanglawt Amyu Shayi Hpung Ginjaw Komiti kaw nna woi awn ai hte International Women’s Day hpawng hpe March shata praw 8 ya shani hkying 10:00am aten hta, Munglai Hkyet Amyu Shayi Sun Wang kaw galaw la lu sai lam chye lu ai.
Hpawng lamang hta, International Women’s Day labau hpe hti shalai ai lam, shatsam mungga tsun ai hte akyu hpyi nawku lamang galaw ai re.
“Moi prat kaw nna Wunpawng amyu shayi ni sha n-ga, mungkan ting na amyu shayi ni yawng lam amyu myu hta grai shagrit shanem da hkrum ai kaw na grai shakut shaja lai wa sai amyu shayi ni hpe katsi la let, Wunpawng Mungdan hta shanu nga ai Wunpawng amyu shayi ni mung shada myit hkrum kakyin gumdin let, amyu shayi ni lu la ra ai ahkaw ahkang hpe lu hkra jawm shakut shaja let shawng lam hta grau nna rawt jat galu kaba wa u ga matu yaw shada let lamang hpe galaw ai lam” Amyu Shayi Hpung Ginjaw Ningbaw Malai Hpawmi Hkangda Roi Nan tsun ai.
Lamang hta, Laiza Muklum Amyu Shayi Hpung Ginjaw Komiti ni, Ginjaw Ginra Ginwang Ginjaw kata na amyu shayi ni yawng shang lawm ai hte lamang hpe galaw la lu sai re.
Mungkan amyu shayi masat ninghtoi lamang hpe shaning shagu galaw ai rai nna, Mungkan Wunpawng Munghpawm hpung hku nna 1975 ning March shata 8 ya shani hpe Mungkan amyu shayi masat ninghtoi ngu nna Munghpawm Amu Madu kawn masat masa galaw da ai re lam chye lu ai.
