International Youth Day lamang galaw
Laiza Muklum Sinpraw Majoi Gawknu kaw August shata 12 ya jahpawt hkying 9:00am aten kaw nna shani ka-ang hkying 12:30pm aten du hkra Laiza Muklum Ramma Komiti, Kachin Development Group ( KDG ) hte Healt Poor Action ( HPA ) na ramma ni woi awn nhtawm, International Youth Day lamang galaw ai lam chye lu ai.
Yaw shada lam hpe jarit mayan hpyen yen ramma bawng ring hte seng nna lit la nga ai KDG na Project Manager Sara Lamung Bawk Htun kaw nna ya na zawn tsun ai.
“Madung gaw jawngma ni, mare buga kaw nga ai ramma ni, hpyen yen ( IDPs ) camp kaw nga ai ramma ni hte Magam Dap kaw nga ai ramma ni shada myit hkrum lam lu, shanhte a lapran shada hprai shai lam ni nga taw ai dai ni hpe shada mara raw hkat nna myit hkrum wa na matu, ramma ni grau nna hkamja wa ai hte hpaji lam hta masan sa wa na matu hte ramma ni kaw nga ai atsam marai hpe shada htawng madun ai marang e, ramma ni shada kasi yu la mai na matu yaw shada let galaw ai re” nga nna tsun ai.
Lamang hta Laiza Muklum Ramma Komiti Ningbaw Sara Lungpu Bawk Hkun kaw nna n gun jaw hkalum shatsam mungga tsun ai, dai hpang group garan nna hta hkrup ga san ni hpe htai ai lamang ni, gam chyam hte social game ginsup ai lam ni hte kumhpa shagrau ai lam ni mung galaw ai re.
2019 ning a International Youth Day ga baw gaw Transforming education nga ai rai nna hpawng lamang hta du sa ai ramma ni gaw Laiza Muklum kata na ramma, jawngma ni, Woi Chyai hpyen yen camp, Woi Chyai Sasana Jawngma ni, Je Yang, Hpun Lum Yang, Ja Htu Kawng, Mungseng Yang hte Hpa-Awn Shalat Jawng na jawngma ni yawng marai 500 jan sa shang lawm ai lam chye lu ai.
