International Youth Day lamang galaw
Internationa Youth Day lamang hpe Woi Chyai Hpyen Yen Ramma Komiti kaw nna woi awn nna, August shata 12 ya jahpawt hkying 10:00am aten hta Zup Awng Simsa gawdin pa kaw galaw la lu sai re.
Ndai lamang galaw ai yaw shada lam hpe Ramma Komiti Ningtau Ningbaw shayi Roi Ja kaw nna tsun ai hta “Anhte hpyen yen gaw lawk (7) du hkra nga ai rai nna, nkau mi gaw kaga shara kaw garan na nga mat ai majaw, ramma langai hte langai kanawn mazum hku hkau lu na matu hte Youth Day hpe myit dum lu na matu re” nga nna tsun ai.
Hpawng hta Youth Day byin wa ai labau tsun ai lam, ga san ga htai game ginsup ai lam hte gawdin htawng lamang ni hpe galaw ai, ndai lamang kaw Woichyai Boarder jawngma ni hte Laiza Lawu tsang jawng sara/num ni yawng marai 200 daram sa du shang lawm ai lam chye lu ai.
International Youth Day hpe lai wa sai 2000 ning kaw nna galaw hpang wa ai rai nna, laning hte laning ga baw hpe la nhtawm galaw ai hta dai ning na ga baw gaw, “Nganggrin Ai Mungkan Byin Wa Hkra Shingra Makau Grup-yin Hpe Atsam Marai Hte Gaw Ga” ngu ai ga baw kata kaw galaw ai re hpe mung chye lu ai.
