J.L.H dakkasu jawngma ni, Jinghpaw ngu ai kadai? Wunpawng ngu ai kadai? ga baw hte zoom meeting lamang galaw na
J.L.H Dakkasu Ni Ginjaw kaw nna woi awn ai (2) lang ngu na online zoom meeting zuphpawng hpe November shata 23 ya shani jahpawt hkying 9:00am aten kaw nna hkying 12:30pm aten du hkra galaw sa wa na re lam chye lu ai.
Jinghpaw ngu ai kadai? Wunpawng ngu ai kadai? Ngu ai ga baw hpe Htunghking Ninghking sara kaba Rev.Marip Bawk San kaw nna ginlen jahpra let sanglang dan mat na re lam chye lu ai.
“Jinghpaw jaw ai, Jinghpaw Wunpawng jaw ai, Wunpawng jaw ai ngu hpe nre sha, Jinghpaw gaw galoi kaw nna lang wa ai mying re, dai sakse sakgan gaw gara hku nga ai, bai nna wunpawng gaw galoi kaw nna pru wa ai, dai sakse sakgan gaw gara hku nga ai, Jinghpaw wunpawng gaw galoi kaw nna pru wa ai, dai sakse sakgan gaw gara hku nga ai ngu ai lam ni hpe Sara Rev. Marip Bawk San hku nna research galaw da ai lam ni hpe Ya na ramma ni chye lu hkra tsun jahpra dan na re. Dai hta mahta nna she gara gaw byin ging ai, jaw ai, anhte hkap la ging ai ngu hpe kadai mung kadai dinghkrai daw dan la na hku ngu yaw shada lam kaba hte ndai lamang hpe woi galaw ai re” nga nna J.L.H Dakkasu Ni Ginjaw amu madu Krawn Naw Awng tsun dan ai.
Jinghpaw hte wunpawng ngu ai amying shingteng shamying ai hte seng nna Anhte myusha ni hta myit nhkum nra ai ten ladaw na wa sai hte maren ramma ni mung tinang nan gara gaw hkap la ging ai ngu hpe chye sawn chye hta la lu na matu re lam J.L.H kaw nna chye lu ai.
“Ya dai ni media prat hta anhte hpe Kachin ngu nna shamying lang wa ai hta anhte kata kaw mung wunpawng hpe ra ai zawn jinghpaw wunpawng ngu ai hpe ra ai ni mung nga ai. Ndai zawn re lam ni hpe anhte a ginru ginsa labau hpe yu nna gara gaw byin ging ai ngu hpe lawan daw dan shagrin la ra sai re. Ndai mang hkang hpe nlu hparan ai shaloi gaw tatut bungli galaw wa ai ten hta chye na shut ai lam ni grai law ai majaw anhte wuhpawng kata hta awng dang ging ai daram n-awng dang ai, myit hkrum ging ai daram myit nhkrum ai lam ni gaw ndai mying ngu ai hpe nchye na shi ai, myi nhpaw shi ai majaw rai nga ai ngu mu mada ai lam”, Krawn Naw Awng matut tsun ai.
Jinghpaw ngu ai kadai? Wunpawng ngu ai kadai? Ngu ai ga baw hte maren sanglang jahpra dan mat wa na zuphpawng hta myit lawm ai jinghpaw wunpawng myusha ni, wunpawng ramma ni kadai raitim mung Online zoom meeting ID; 85393481331 hte shang lawm hkaja madat mai ai re.
Ndai zuphpawng gaw J.L.H Dakkasu Ni Ginjaw kaw nna woi awn galaw ai (2) lang na zoom meeting zuphpawng lamang rai nna (1) lang na zoom meeting lamang hta mung “Htunghking hte shachyen shaga ai lam” ngu ai ga baw hte ramma n gun yawng 40 daram, shang lawm sharin la lu sai re hpe matut chye lu ai.
