J.L.H Dakkasu ni Myitkyina kaw nna (1) lang na laili laika hkaw tsun hpawng galaw na
Photo Credit; J.L.H Dakkasu ni Myitkyina
Jinghpaw Wunpawng Laili Laika hte Htunghking Hpung (J.L.H) Dakkasu ni Myitkyina kaw nna woi awn nhtawm (1) lang na Laili Laika Hkaw Tsun Hpawng hpe December shata 12 ya shani hta Myitkyina- Manhkring, Akyu Center kaw galaw sa wa na re lam chye lu ai.
“Ramma ni hpaji hte loi tsan gang wa ai ngu mu mada ai. Anhte myusha ni hpaji chye ra ai. Hpaji a manu hpe chye shadan hkra, chye jai lang hkra, hpaji hte tinang a kanbau magam bungli hpe chye galaw sha mat wa hkra ngu yaw shada let ndai zuphpawng lamang hpe galaw ai re” nga nna J.L.H Dakkasu ni Myitkyina Amu Madu Shadang Tangbau Seng Di Awng tsun ai.
Ya aten hta grai hkrit tsang ra nga ai COVID-19 ana zinli a majaw asuya masat da ai tara hte maren hkannang hkansa sharin hkaja la lu na matu hte aten kadun laman hta ramma ni hpe tangdu hkra sharin ginlen ya lu na matu masha hpe marai 20 sha hkapla sharin sa wa na rai nna, myit lawm ai Wunpawng ramma ni sharin hkamla mai ai re.
Wunpawng ramma ni hku nna hpaji hka ja ai lam hta “Hpaji gaw kade daram ahkyak ai rai, hpaji gaw hpa rai, hpaji hpe gara hku hka ja wa na rai, hpaji hpe gara hku jai lang ra na rai” ngu ai lawng lam ni hpe sharin hkamla nna chye na wa let ta tut jai lang wa na matu re lam, J.L.H kaw nna chye lu ai.
Hkaw tsun hpawng hta “Ramma hte Hpaji” ngu ai ga baw hpe Naushawng Development Institude sharin Sara Nhkum La San Awng kaw nna sharin ginlen ya na re.
Ndai zuphpawng gaw J.L.H Dakkasu ni Myitkyina kaw nna woi awn galaw ai shawng ningnan lang na laili laika hkaw tsun hpawng rai nna, matut galaw sa wa na masing ni mung nga ai re lam chye lu ai.
