Ja htu sha nga ai mungshawa ni hpe Myen hpyen dap ni gawt shapraw nga
KIA Dap Ba ( 2 ) Dap Dung ( 14 ) ginra hta shamu shamawt nga ai Myen Hpyen Dap ni gaw, September 15 ya shani Tung Mari Ja Maw kaw Ja htu bungli galaw sha nga ai mungmasha ni hpe Ja Maw kaw na lawan pru na matu gawt shapraw nga ai lam na chye lu ai.
Ja maw de htaw lung wa ai Jak sau hte n-gu malu masha ni hpe pat kau ya ai sha n-ga, Hkaman Si Ja Maw na Ja hpawng ni hpe mung wan nat jahten kau ya ai.
Myen hpyen dap ni kawn Ja htu bungli galaw sha nga ai mungmasha ni hpe ndai laman Ja maw na lawan pru na matu, ndau tawn ai lam ni nga ai hpe na chye lu ai.
Ya aten hta Danai hka lawu lahta shara ni hkan Myen Hpyen Dap ni shagyit ( Gate ) law law jahkrat tawn nhtawm, lai wa lai sa yu yu lung lung galaw nga ai mungshawa ni a Jak li ni hpe laja lana sawk jep pat nga ai lam, ginra shisawk ni kawn chye lu ai.
