Ja Tawng Naw Ma Shalet Jawng, (25) lang na jawng yu hpawng hte Gumhpraw Jubili chyeju shakawn hpawng galaw
Sama Ginwang, Nawng E Hku Jinghpaw Wunpawng Hkalup Hpung, Ja Tawng Naw ma shalet jawng a (25) lang na jawng yu hpawng hte gumhpraw jubili chyeju shakawn hpawng hpe March shata 17 ya shani galaw la lu sai re.
Hkying 7:00am aten hta hkapang hpaw ai hte hkying 9:00am aten kaw nna, jawng yu hpawng hte jubili chyeju shakawn hpawng hpe galaw la lu sai re.
Ma shalet jawng a yaw shada lam gaw, makam masham hpe npawt hkridun tawn nna, kaja hkrak ai sharin lamang ni hpe jai lang lu na matu, ma ni lu ging ai ahkaw ahkang ni hpe hkumtsup hkra hkam la lu na matu, jawng hta ma ni simsa shimlum myit pyaw ai hte wanglu wanglang sharin la lu na matu, ma ni shada manu shadan hkungga tsawra let, ladat jaw ai hku lanu lahku sharin hkam la lu na matu hte ma ni a hkum dingnum bawngring wa na matu re ai lam, ka da ai.
Ma shalet jawng hta ma ni hpe pang 3 garan nna sharin ai hta lai wa sai 2022 ning kaw du hkra gaw, Nawng E Hku Nawku jawng wang kaw jawng yu ai lam hpe galaw ai raitim, dai ning gaw ma shalet jawng hpaw hpang ai (25) ning ladu hkrum sai re majaw, gumhpraw jubili chyeju shakawn hpawng hte hpawn Ja Tawng Naw ma shalet jawng kaw galaw ai lam re hpe chye lu ai.
Ja Tawng Naw ma shalet jawng kaw na awng pru mat wa sai jawngma ni yawng marai 1054 nga sai rai nna, nkau mi mai gan de jawng matut lung taw ai ni, chyum dakkasu lung ai ni, mungdan magam bungle gun hpai taw nga ai ni hte kaga mungdan shara shagu hkan chyam bra nga sai re lam chye lu ai.
Buga hpung hpe lai wa sai 1994 ning December shata (28) ya shani hta gaw de hpang wa ai rai nna, KBC hkristan hpaji dap kaw na woi awn galaw ai hte Ja Tawng Naw ma shalet jawng hpe hpaw sharin sa wa ai 25 ning ladu hkrum sai lam chye lu ai.
