Jawng ma ni hpe hkam ja lam hte seng nna hkaw tsun sang lang hpawng galaw
Mungkan Ka-ni Nanghpam Masat N’htoi June, 26 ya shani hpe madi shadaw ai nna Jawng ma na a hkam ja lam hte seng nna hkaw tsun hpawng hpe Laiza Muklum Lahta Tsang Jawng Rawt Ning Hkawng Gawknu kaw June, 22 ya jahpawt hkying 9:30am aten kawn hkying 11:30am aten du hkra hkaw tsun hpawng galaw nna, hkying 2:00pm aten hta gaw Jawng wang kata kaw hpun hkai ai lam galaw na re hpe chye lu ai.
Ya na zawn hkaw tsun hpawng galaw ai gaw Ka-ni nanghpam hpe nra sharawng ai lam hpe madi shadaw ai hte Jawng ma ni hkam ja zet let ai hte hpaji sharin hkam la lu na matu yaw shada ai re lam mung chye lu ai.
Hkaw tsun hpawng hta Ginjaw hkam ja dap kaw nna tsi du Maran Naw San kawn Ka-ni nanghpam hpe koi ra na lam, Ka-ni nanghpam a majaw hkrat sum ai lam ni hte hkam ja lam ni hpe tsun sang lang dan ai.
Tsang 5 kawn tsan 7 du hkra ni hpe gaw Ka-ni nanghpam hte seng ai lam ni hpe tsun sang lang dan nna shana daw hkying 1:00pm aten hta gaw Jawng kaji kawn tsang 4 du hkra ni hpe gaw san seng san pan lam ni hpe tsun dan ai. Jawngma ni yawng marai ( 624 ) tup re lam chye lu ai.
