Je Yang dabang hpyen yen nta wan hkru

Je Yang hpyen yen dabang hta March shata 19 ya shana maga, hkying 3:35pm aten daram hta nta wan hkru hkrum mat ai re.

Wan hkru hkrum ai gaw lawk 6 (B) kaw rai nna, nta 37 hkru lawm mat hte dai nta ni hta shanu nga ai masha yawng 177 rai nna, myi hprap wan hte shana shat shadu sha nga ai kaw na hkru hpang wa ai lam chye lu ai.

Wan hkru hkrum ai dum nta ni hte seng nna, Je Yang Hpyen Yen Dabang Up Salang Kaba Zunwa La Seng tsun ai hta “Ya ndai hpyen yen mung shawa 177 tup hpe gaw, ginjaw hpyen yen lakawn lanawn komiti a matsun hte maren, dabang komiti hku na mung shat malu masha hte seng nna dabang amyu shani ni hpe lit jaw shatsam da ai lam ni nga sai, ra nga ai hpun palawng nba dinghku arung arai ni hpe gaw anhte lawk shagu, nawku hpung ni hpe jahkrup la rai nna, bai lajang sa wa na re” nga tsun ai.

Ya aten mung shawa ni hpe Je Yang lawu tsang jawng kaw shara jahkrat da ai rai nna, ntsa tsang na lam masan ya ai lam hpa nnga shi ai re majaw, 2, 3 ya daram gaw anhte ndai hku naw hparan ra na re nga Salang Kaba matut tsun ai.

Wan hkru ai hta masha hkra hkala ai lam hpa nnga ai raitim, ja, gumhpraw nta arung arai hpa nlu la mat ai lam, lawk kata nga ai Saranum Htoi Ra tsun ai hta “Nawku kaw na wa ai hte yawng hkru chyang taw nga ai hpe wa mu kajawng mat ai, arung arai wa la na nga tim hpa mung nlu wa la dat ai hpa nchye galaw mat ai, tinang grai ra sharawng ai laika ni, jawng hte seng ai laika ni langai ma nlu la kau dat ai, grai yakhkak hkra lung tawn da ai boi lekmat ni mung nlu la ai, arung arai gaw hkum tsun sa, grai manu shadan ai rai ni pyi nlu la ai” nga tsun ai.

Wan hkru hpang ai hte KIO Ningbaw Malai Du Kaba Sumlut Gun Maw hku na, wa yu kawan ai hte ra ai lam ni hpe matsun kau da ai rai nna, wan hkru ai hte wan sat modo 3 hte wan lu sat shazim kau sai re.

Je Yang hpyen yen dabang gaw 2011 ning kaw na hpyen yen mung shawa ni hpyen koi yen wa sai rai nna, ya ten hpyen yen htinggaw 1527 nga ai rai hte masha yawng 8338 nga ai re lam chye lu ai