Je Yang hpyen yen dabang na Ma num kasha marai (3) sat kau hkrum
Je Yang hpyen yen dabang na Ma num kasha marai (3) zingri sat kau hkrum ai lam chye lu ai.
February shata 22 ya shani Je Yang dabang kawn, Mung Seng Yang de sa nna bai nhtang wa ai lam lapran kaw mat mat ai, Je Yang hpyen yen dabang lawk (6) na Ma num kasha marai (3) zingri sat kau hkrum ai hta moi mang (2) hpe February shata 25 ya shana hkying 11:00pm aten daram kaw mu tam ai hpang, February 26 ya jahpawt hkying 1:30am aten daram hta moi mang (1) hpe bai mu tam la ai re lam, lit nga ai salang ni tsun ai.
Asak si sum mat ai Ma num kasha ni gaw, Shayi Nangzing Ji San Mai asak (10) ning, Shayi Hpauyawm Sut Seng Ing asak (11) ning hte Shayi Lahtaw Roi Seng asak (10) ning ni rai nna, jawng laika tsang masum kaw lung nga ai jawngma ni re hpe chye lu ai.
Ma mat ai hte seng nna nta masha ni kawn, seng ang ai dabang de shana nhtawm lit nga ai dabang myitsu kanu kawa ramma ni, magam dap makan dap hkan na magam gun ni jawm tam ai hta tara hkam, Salang Ungsau Doi Awng hpe sagawn tam la lu ai re hpe chye lu ai.
Salang Ungsau Doi Awng gaw Je Yang kaw shanu nga ai rai nna, Dum Bum maga de hprawng yen nga ai kaw seng ang ai salang ni kawn lu rim la nhtawm, ya na zawn moi mang ni hpe bai mu tam sagawn la ai re hpe chye lu ai.
Ndai Ma num kasha ni a hkum tsawp moi mang hpe February shata 26 ya shana de hkying 3:00pm aten hta Je Yang gawknu kaw lit nga ai salang ni hte nawku hpung woi sara ni kawn, makoi mayang akyu hpyi hpawng galaw nna, Laiza lupding lupra de makoi mayang ai lam galaw sai hpe chye lu ai.
Tara hkam Salang Ungsau Doi Awng hpe mung, ya aten seng ang ai Shanglawt Asuya ni hku nna lit la nhtawm, mabyin npawt nhpang hpe jep joi sa wa na re lam, lit nga ai salang ni tsun ai kaw na chye lu ai.
