Je Yang IDPs lapran tsang jawng kaw hkrang pan madun lamang galaw

Je Yang IDPs lapran tsang jawng kaw December shata 19 ya shani hkying 2:00pm aten hta, hkrang pan myit lawm ai jawngma ni ka/soi shapraw tawn ai hkrang pan madun lamang galaw la lu sai re.

Je Yang IDPs jawng hta ya aten hkrang pan soi nga ai jawngma ni marai 150 jan hte hkrang pan sharin sara/num marai 4 nga ai rai nna, hkrang pan madun lamang hpe ndai lang shawng nnan galaw ai re.

Jawng kata jawngma ni hpe hkrang pan woi soi, hkrang pan madun lamang ni woi galaw ai marang e, jawngma ni grai myit dik myit pyaw ai hpe mu lu ai lam, Je Yang IDPs jawng kaw na KBC apnawng sara Marip Hkawng Dau tsun ai.

Hpaji jawng kata hkrang pan soi sharin ya ai lam hta, Irrawaday organization ni kaw nna hkrang pan sharin sara/num (TOT) shalat ya ai lam, hkrang pan soi ai hta ra ahkyak ai lang rung lang rai ni hpe madi shadaw ya ai lam chye lu ai.

Irrawaday wuhpung wuhpawng ni kaw nna hkrang pan soi ai lam hpe 2014 ning kaw nna hpaji jawng ni sharin sara/num shalat ai hte woi hpang ai raitim, jawng kata hta gaw jawngma ni hpe 2015 ning kaw nna tatut woi soi ai re lam chye lu ai.

Ya aten Je Yang IDPs lapran tsang jawng hta KBC Sasana apnawng sara/num ni, Shanglawt Asuya jawng sara/num ni yawng marai 70 hte jawngma yawng marai 1026 hpaji sharin hkam la nga ai lam chye lu ai.

Photo Credit; Mai Mai Seng Lahpai