JHG amyu shayi komiti kaw nna “Htungghking Magun Shatlit A Lam” sharin hpawng galaw na
Jinghpaw Wunpawng Htunghking hte Laili Laika Hpung Ginjaw (JHG) Amyu shayi komiti kaw nna “Htungghking Magun Shatlit A Lam” ngu ai sharin hpawng hpe January shata 29 ya shani Jahpawt hkying 9:00am aten kaw nna 3:00pm aten du hkra JHG rung kaw galaw sa wa na re lam chye lu ai.
Sharin hpawng hta Htunghking magun shatlit a shingdu labau, Magun shatlit hpe ta tut makyit makai lam hte lachyum shaleng ai lam, Num wawn numla hte shaman matan ga lachyum ni hpe sharin sa wa na re lam JHG kaw nna chye lu ai.
“Anhte ndai hku galaw sa wa ai lam gaw anhte jinghpaw wunpawng myusha ni a htunghking lailen ni hpe nshamat na matu, htawm hpang bai pra wa na kashu kasha ni hpe du hkra anhte a htunghking ni hpe ginlen da mayu ai majaw JHG amyu shayi komiti ni hku nna woi awn let ndai lamang hpe galaw sa wa ai re” nga nnaJHG Ningbaw Du Wa Htingnan yaw Sam tsun ai.
Ndai sharin hpawng hpe COVID-19 aten ladaw re majaw masha marai (50) hpe sha hkapla sharin sa wa na rai nhtawm myitlawm ai, sharin hkaja mayu ai ni 100 jan lahta de law wa ai rai yang, nhtoi hpe jat masat let sharin ginlen ya na matu hkyen lajang nga ai re hpe mung chye lu ai.
“Jinghpaw wunpawng myusha ni a htunghking lailen rai nga ai magun shatlit hte seng ai num wawn numla shatlit, mayu dama shatlit hte yawn hkyen poi hta lang ai shatlit ngu ai ndai ni hpe JHG amyu shayi komiti ni kaw nna woi awn galaw sa wa na re majaw jinghpaw wunpawng myusha ni kadai mung shang lawm sharin hkaja la ga” nga nna JHG kaw nna saw shaga da ai re.
(JHG) Amyu shayi komiti ni a shawng ningnan lang na “Magun Shatlit a lam” ngu ai sharin hpawng hta myit lawm ai kanu num ni hte ramma ni kadai raitim mung manu jahpu nhkrat ra ai hte shanglawm sharin hkaja la mai ai re lam chye lu ai.
