JHG hte Lung Sha Yang Gaiwang Htunghking Salang ni hkrumzup bawngban hpawng galaw
Lung Sha Yang Gaiwang kata na Myen Asuya hpaji jawng ni hta Jinghpaw laika sharin sa wa na lam hte seng nna Jinghpaw Wunpawng Htunghking hte Laili Laika Hpung Ginjaw (JHG) hte Putao Ginwang, Lung Sha Yang Gaiwang Htunghking Salang ni August shata 16 ya shani hkrumzup bawngban hpawng galaw ai lam na chye lu ai.
Bawngban hpawng hta Lung Sha Yang Asuya jawng hta Jinghpaw laika sharin sa wa na lam hte labau shang Rudi lamu Ga ni hpe makawp maga sa wa na lam ni hpe bawngban la lu sai lam, JHG Ningbaw Duwa Htingnan Yaw Sam tsun ai.
“Lung Sha Yang kaw asuya jawng lawu tsang lapran tsang lahta tsang nga ai dai jawng kaw Jinghpaw laika garai nlu sharin shi ai masa nga ai, dai re majaw dai kaw Jinghpaw laika sharin lu na matu, Lung Sha Yang makau grup yin na anhte a moi na ginru ginsa hte seng ai labau shang bum ni nga ga ai, dai shara ni hpe anhte makawp maga la lu na matu kaga lawu ga na Myen, Sam, Gala Miwa ni madu la kau ya baw ni nbyin na matu madung dai lahkawng bawngban ai” nga nna tsun ai.
Putao Ginwang kata na asuya jawng ni hta Jinghpaw laika sharin ya lu ai rai yang, anhte kata shada grau nna zinlum wa lu na re lam matut tsun ai.
“Lisu, Rawang ni hpe mung anhte a yawng lang ai common language rai nga ai Jinghpaw laika hpe chye sai nga yang anhte shada matut mahkai lam hta mung Jinghpaw hku nna shaga lu na, grau nna mung Jinghpaw laika hpe chye wa sai Ma ni a matu mung myutsaw myit mungtsaw myit grau nna bang ya lu na, anhte a labau ni hpe grau nna sharin ya lu sai nga yang mung anhte kata kaw mung grau magyep kap nna ngangkang wa lu na re ngu yaw shada ai ga rai nga” nga nna tsun ai.
Putao Ginwang kata 2020-2021 ning hpaji ladaw kaw nna Jinghpaw laika sharin sa wa lu hkra jahkrup da ai lam nga ai hte matut nna Lung Sha Yang Asuya jawng hta Jinghpaw laika sharin lu na matu JHG kaw nna jawng sara/num shalat ai lam galaw sa wa na re hpe mung chye lu ai.
JHG kaw nna Jinghpaw Mung kata nga ai Myen Asuya Hpaji jawng shagu hta Jinghpaw laika sharin lu hkra tsang hte tsang nbyin byin hkra ladat shaw galaw sa wa na masing nga ai re majaw, Jinghpaw Wunpawng Amyusha ni yawng mung, ndai hpe n-gun jaw nna Mungdan lu ai amyu, laika lu ai amyu kaba langai byin tai wa hkra common language Jinghpaw laika hpe lang nna rau myit hkrum sa wa ga nga nna JHG Ningbaw Duwa Htingnan Yaw Sam hpaji jaw tsun da ai kaw na chye lu ai.
Photo Credit; JHG News Kachin State
