Jinghpaw Mung kata COVID-19 ana kap ai masha nnan marai 26 bai mu jep
Jinghpaw Mung kata COVID-19 ana kap ai machyi masha nnan marai 26 bai jep mu lu ai lam, Jinghpaw Mungdaw Mungshawa Hkamja Rung kawn September shata 30 ya shani ndau da ai kaw na chye lu ai.
Ana jep mu lu ai machyi masha ni gaw Hpakant Tawng Pyu kaw na marai 23, Mu Nyin kaw na marai 2 hte Myitkyina kaw na marai 1 re lam chye lu ai.
Hpakant Tawng Pyu kaw na COVID-19 ana kanu jep mu lu ai machyi masha ni gaw COVID-19 ana kap ai masat (1712) hte hkrum shaga ai Tawng Pyu mare masha ni rai nna, Mu Nyin kaw na ana kanu jep mu lu ai machyi masha langai gaw Tsi Sara magam gun rai nna, marai langai gaw ana kap ai masat (10411) hte hkrum shaga ai machyi masha re lam, Myitkyina kaw na ana jep mu lu ai machyi masha gaw Yangon kaw na September shata 15 ya shani Myitkyina kaw du wa ai rai nna, hkawm sa hkawm wa jahkring da ai wa re hpe mung chye lu ai.
Ya aten Myen Mungdan kata hta sha n-ga, Jinghpaw Mung kata Hpakant ginra hta mung COVID-19 ana zinli kap bra ai masha lani hte grau law jat wa sai re majaw, Hpakant ginra hta gaw Quarantine dabang hpe Hpakant, Seng Tawng, Lawng Hkang shara masum garan nhtawm, Quarantine bang nna ana jep chyoi ya nga ai lam, Sara Dashi Naw Lawn tsun dan ai.
“Myo Ne Sara Wun wa tsun ai hte maren grau sadi nna grau tsang wa ra ai nga nna mungshawa ni hpe ndau shana ai lam ni gaw tsun nga ai, mungshawa ni mung ya gaw shawoi na hku grai sha n ahkyak yang shinggan n gale sai, nhkawm sai machyi masha law wa ai majaw galoi mung sadi maja nna nga nga ga ai” nga nna tsun dan ai.
Ya aten Myen Mung kata COVID-19 ana kap ai masha marai 12000 jan nga sai lam, ana hkyem sa wa ai majaw tsi rung yu ai masha marai 318, ana a majaw asak si sum mat ai masha marai 284 du nga sai lam Hkamja Lam hte Ginsup Hkringmang Dap kawn ndau da ai re. Jinghpaw Mung kata hta mung COVID-19 ana kap ai machyi masha marai 45 du nga sai rai nna, ana hkyem sa wa ai majaw tsi rung yu ai masha marai 13 nga ai lam chye lu ai.
Photo Credit; Fb
