Jinghpaw mung kata laika kanu buk nlu ai majaw, jawngma ni mayak hkrum nga
Jinghpaw mung kata, gumshem Myen hpyen dap ni hpaw sharin nga ai jawng ni hta laika kanu buk nlu ai majaw, jawngma ni mayak hkrum nga ai lam chye lu ai.
Ya aten jawng hpaw aten rai sai hte maren, gumshem Myen hpyen dap ni hpaw sharin nga ai hpaji jawng ni hta laika kanu buk nlaw ai majaw, jawngma ni mayak hkrum nga ai lam, jawmma kanu kawa ni kaw na chye lu ai.
Mayak hkrum nga ai lam hte seng nna, Putao ginra jawngma kanu kawa langai tsun ai hta “Jawng ap ai lam ni galaw sai raitim, laika kanu buk hpe jawng kaw na njaw ai, shinggan kaw mung mari la nlu ai, jawngma ni yawng laika gaw sharin ra sai raitim, laika kanu buk nlu ai majaw yakhkak nga ai” nga nna tsun ai.
Myitkyina ginra hta mung, laika kanu buk ni nlaw ai lam ni byin nga ai rai nna, laiwa sai shaning hta gaw jawng lung ngut sai jawngma ni laika kanu buk hpe jawng de bai ap ya shangun ai lam ni galaw ai hpe chye lu ai.
Ndai zawn Jinghpaw mung kata laika buk kanu nlaw ai lam gaw Myitkyina, Mandalay lam nhpaw ai majaw rai nna, Danai hte Chihpwi ginra ni hta mung, jawng kaw nna laika buk kanu nhtuk ya ai sha n-ga, shinggan seng ni hta mung nlu mari la ai lam chye lu ai.
Jinghpaw mung kata jawng ni bai hpaw wa sai hta jawng lung ram ai jawngma ni law law nga ai raitim, mayak amyu myu a majaw jawngma nkau, jawng nlu lung ai lam ni byin nga ai hpe matut chye lu ai.
