Jinghpaw mung kata tsang 10 htai na jawngma marai 9500 jan nga ai hta na, marai 800 daram san poi sa htai ai lam nnga
Gumshem Myen hpyen ni hpaw sharin ai hpaji jawng a tsang 10 san poi hpe March shata praw 8 ya shani kaw nna, Myen mungdan ting htai sa wa ai hta Jinghpaw mung kata tsang 10 htai na jawngma marai 9500 jan nga ai hta na, marai 800 daram san poi sa htai ai lam nnga ai hpe chye lu ai.
Tsang 10 htai na matu, mying jahpan bang da ai marai 10327 nga ai hta jawngma marai 9533 sa htai nna, marai 794 nsa htai mat ai lam, shiga dap nkau ni kaw na chye lu ai.
Gumshem Myen hpyen jawng a 2023 hpaji ladaw hta tsang 10 san poi hpe san htai galaw ai lam hpang jahtum rai nna, bai du wa na shaning ni hta gaw, Grade 12 du hkra san htai galaw sa wa na re lam chye lu ai.
Lai wa sai 2022 ning hpaji ladaw hta gumshem Myen hpyen ni hpaw sharin ai jawng kaw, Jinghpaw mung kata nga ai tsang 10 htai ai jawngma marai 11384 nga ai hta na, marai 5325 htai awng la lu sai hte Jinghpaw mung kata gunshem Myen hpyen a tsang 10 san poi jen jep ai makan dap rung 32 nga ai re hpe mung chye lu ai.
Matut nna KIA/ KIO ni hpaw sharin ai hpaji jawng a 2022, 2023 ning hpaji ladaw a tsang 10 san poi hpe March shata praw 8 ya shani kaw nna, jawng shagu htai ding yang galaw nga ai re.
