Jinghpaw Mung ramma wuhpung wuhpawng ni kaw nna Kachin state day masat masa lamang ni galaw
anuary shata 10 ya shani rai nga ai (73) ning hpring Jinghpaw Mungdaw masat nhtoi (Kachin state day) hpe masat masa galaw ai hku nna Jinghpaw Mung kata nga ai ramma wuhpung wuhpawng (6) pawng hpawm nna, Myitkyina Chan Yin Hku Hotel wang kaw sumla madun lamang, Myitkyina Muklum kata lagaw leng jawn shinggrup ai lamang, myusha dawnghkawn hpe masha hpawng kata hkan shakap ai lamang, video clip (story) madun shapraw ai lamang hte ndau laika shapraw ai lam ni galaw ai re lam chye lu ai.
Sumla madun lamang hta, Kachin state day hte seng ai sumla ni, labau shang sumla ni hpe madun ai rai nna, January shata 10-11, 2 ya madun na re majaw, kadai raitim sa mai yu hkaja ai lam chye lu ai.
Myusha dawnghkawn, Mungdan dawnghkawn shakap nna, Muklum kata lagaw leng jawn shinggrup ai lamang hpe gaw, jahpawt 9:00am-12:30pm aten laman ramma 100 daram shang lawm let galaw la lu sai lam chye lu ai.
“Lamang galaw ai yaw shada lam gaw, Jinghpaw Mung kata nga ai ramma wuhpung ni bung ai bandung langai tawn nna ta gindun lu na matu, Jinghpaw Mung gaw Jinghpaw Du wa ni nan uphkang lai wa ai anhte a lamu ga majing re ngu ai hpe chye shangun mayu ai, yawng hpe htawng madun mayu ai lam re.
Munghpawm Myanmar Mungdan byin wa ai gaw, Jinghpaw Wunpawng ni ningpawt re, grai ahkyak ai daw hku shang lawm wa ai ni re ngu ai hpe bai shadum ai hku nna galaw ai re. Majan nhpan, nanghpam lu sha a majaw, mungkan madang hta ramma ni kade ram hpang hkrat mat ai, gara hku hkra machyi mat ai ngu hpe htawng madun ai lam nga ai.
Mungdaw kata byin taw ai dinghku majan ni hta, Jinghpaw Wunpawng amyu ni sha nre sha, ndai lamu ga kaw rau jawm nga taw ai kaga amyu ni hta mung, lit nga ai ngu yawng hpe chye shangun mayu ai.
Jinghpaw Mung hta pru ai nhprang ni hpe madung tawn nna Jinghpaw Mung kaw nga ai amyu sha ni akyu grau hkam sha hkra, rawt jat galu kaba wa hkra gara hku jawm galaw mai ai ngu hpe hpyi shawn ai hte Jinghpaw Mung rawt jat na matu hpaji hpe madung dat ai, simsa lam hpe madung tawn ai, mungmasa hpe gin shalat ya na matu yaw shada ai re” nga nna JLH Dakkasu ni Ginjaw Amu Madu Shadang Krawn Naw Awng tsun ai.
Lamang hpe JLH Dakkasu ni Ginjaw, Ram Hkye, Jinghpaw Wunpawng Ramma Hpung Zinghkri, Jinghpaw Mung Ramma Komiti, All Kachin Youth Union hte Debate Society wuhpung wuhpawng (6) kaw nna woi awn galaw ai re lam chye lu ai.
Photo Credit; Krawn Naw Awng
