Jinghpaw Mungdaw Asuya kaw nna hkauhting hkauna nlu ai Nawngmi mare masha ni hpe jahkrat ya ai lamu ga garai nlu garan
Hugawng Ginwang, Nawngmi mare kaw na hkauhting hkauna nlu ai mung mare masha ni hpe Jinghpaw Mungdaw Asuya kaw nna Hka Chyang Hka hte Mugawng Hka lapran kaw galaw lu galaw sha shara lamu ga Eka 200 masat jahkrat ya ai raitim, dai lamu ga hte seng nna manghkang ni naw nga taw ai majaw, ya aten du hkra dai lamu ga hpe garai n lu garan ai lam buga masha ni tsun ai kaw na chye lu ai.
Bankawk San Pya mare masha ni lamu ga shawk shawn da ai raitim, kaja wa lamu ga lu ai gaw Nawngmi mare masha ni rai nna, ndai lamu ga garan sa wa na lam hte seng nna Asuya hte naw bawngban jahkrup nga ai lam, Nawngmi Ninghtawn Sawn Hpajang Magam Komiti malawm salang Shangdin Bawk Naw tsun ai.
“Ndai Asuya hte seng ai ni hte naw jahkrup bawngban taw ai lam rai nga, lamu ga hpe garai nlu garan shi ai, ya dai shanhte hte garan lu na matu naw jahkrup bawngban taw ai madang sha naw rai nga, Myo Ne kaw na jep chyoi ai lam galaw nna, ေတာင္သူ ni a ထြက္ဆိုခ်က္ la nna ndai hku naw hparan taw nga ai, ထြက္ဆိုခ်က္ hta hkan nna Myo Ne kaw na matsun garai npru shi ai” nga nna tsun ai.
Bankawk San Pya mare masha ni gaw lamu ga hpe Mungdaw Asuya de shawk shawn da ai lam nga ai rai nna, Myo Ne Asuya kaw nna gaw Nawngmi mare masha ni hpe shawng lamu ga jahkrat ya wa ai majaw, masing shang taw ai kata kaw Nawngmi mare masha ni hkap galaw la ai re lam, Salang wa matut tsun ai.
“San Pya mare masha ni gaw Mungdaw Hkringmang de kalang ta laika mara dat ai, Myo Ne kaw na ni gaw Nawngmi hpe jahkrat dat ya ai, dai kaw kaji mi chye na shut ai lam rai nga, dai majaw San Pya mare masha ni gaw lawu tsang kaw na tsang hte tsang nlung wa ai sha bungli galaw dat ai majaw, dai kaw kaji mi mayak mahkak nga taw ai rai nga” nga nna tsun dan ai.
Ndai lamu ga amu hte seng nna, Nawngmi mare masha ni hte Bankawk San Pya mare masha ni gaw seng ang ai ginra Asuya de tang madun hpyi shawn da ai lam nga ai rai nna, ndai lam hte seng nna sha Myo Ne Salang ni hte bawngban jahkrup ai lam ni galaw nga ai re hpe chye lu ai.
