Jinghpaw Mungdaw Dingchyai Hkyeng Hpung kaw nna yak hkak hkrum nga ai hpyen yen htinggaw ni hpe garum ningtum jaw

Jinghpaw Mungdaw Dingchyai Hkyeng Hpung (ကခ်င္ျပည္နယ္ ႀကက္ေျခနီအသင္း) kaw nna December shata 14 ya shani hta, COVID-19 ana zinli a majaw, yak hkak hkrum nga ai Myitkyina Muklum kata na hpyen yen htinggaw 45 hpe gumhpraw garum ningtum jaw ai lam na chye lu ai.

Shatapru, ဧမာေႏြဧလ hpyen yen camp kaw na htinggaw 16, ဒဂုံဒမ္ (Myitkyina Nawng Pung maga na) hpyen camp kaw na htinggaw 2 hte Pang Mati hpyen camp (Namti Kasung hpyen yen kaw na htawt wa ai) kaw na htinggaw 27 hpe htinggaw mi hta, gumhpraw sen 4 garum ningtum jaw ai re.

Hpyen yen camp ni hta garum ningtum lu ai nlu ai hpe yu nhtawm, asak kaba sai ni lawm ai kun?, machyi makaw nga ai kun, gaida ni woi awn taw ai dinghku rai kun?, gaida htinggaw gaw rai nna Ma law, asak kaba ai law ai zawn re hpe yu nna garum ningtum jaw ai re lam, Jinghpaw Mungdaw Dingchyai Hkyeng Hpung Ningbaw Duwa Lahpai Brang Di tsun ai.

COVID-19 ana zinli byin nga aten hta, hpyen yen tsim yam hkrum nga ai IDPs camp kaw na mungchying mungshawa ni hta lu ging lu ang ai ahkaw ahkang hpe lu la na matu garum ningtum jaw ai re sha n-ga, COVID-19 ana zinli a majaw yak hkak hkrum nga ai laksan kun dinghku ni hpe mung, jahpan hta nna garum ningtum jaw nga ai lam, Duwa Lahpai Brang Di matut tsun dan ai.

Jinghpaw Mungdaw Dingchyai Hkyeng Hpung kaw nna 2011 ning majan nnan byin hpang ai, hpang shaning kaw nna ya na zawn garum ningtum jaw ai lam hpe Myen Asuya Uphkang ginra hta shanu nga ai hpyen yen camp ni hpe garum ningtum lu jaw ai raitim, laksan uphkang ginra hta shanu nga ai hpyen yen ni hpe gaw garum ningtum garai nlu jaw ai lam, matut nna aten masa hta hkan nna yak hkak hkrum nga ai kun dinghku ni hpe garum ningtum jaw na matu yaw sing da ai lam na chye lu ai.

Photo Credit; Mrcs Kachin