Jinghpaw Mungdaw Dingchyai Hkyeng Hpung ni kaw nna Nam San mare de gumhpraw garum ningtum sa du jaw
Jinghpaw Mungdaw Dingchyai Hkyeng Hpung (ကခ်င္ျပည္နယ္ ႀကက္ေျခနီအသင္း) ni kaw nna December shata 26 ya shani hta, hpyen majan a majaw hpyen koi yen hkrum nna ya aten tinang mare buga de bai nhtang wa nga taw sai, Nam San Yang mare kaw na htinggaw 50 hpe htinggaw mi hta, gumhpraw kyats sen 4 hpra sa du garum jaw ai lam na chye lu ai.
December shata 27 ya shani hta mung, Myitkyina Mali Nmai Hka Zup makau mayan kaw shanu shingbyi nga ai mare kahtawng ni kaw na yakhkak hkrum nga ai htinggaw 60 hte Sinbo mare kaw na htinggaw 55 hpe htinggaw mi hta, gumhpraw kyats sen 4 hpra sa du garum jaw ai rai nna, garum ningtum jaw ai lam hta, mare buga de na seng ang ai mare uphkang salang ni hte matut mahkai nhtawm, yakhkak hkrum nga ai htinggaw jahpan hpe hta la nna garum ningtum sa du jaw ai re lam, Jinghpaw Mungdaw Dingchyai Hkyeng Hpung Ningbaw Sara Lahpai Brang Di tsun ai kaw na chye lu ai.
Jinghpaw Mungdaw Dingchyai Hkyeng Hpung ni kaw nna COVID-19 aten laman hta, yak hkak hkrum nga ai htinggaw ni hpe gumhpraw garum ningtum hkan jaw ai lam galaw ai sha n-ga, COVID-19 ana makawp maga ai kaw jai lang ai arung arai ni hpe mung, garum ningtum jaw nga ai lam, COVID-19 ana zinli byin nga ai aten laman hta, Mungdan Asuya hte Mungdan Hkamja Dap kaw nna masat shagrin da ai rit kawp tara ni hpe hkan nang hkan sa let, ana zinli kaw na lawt lu hkra shakut shaja sa wa ga nga nna Sara Lahpai Brang Di matut tsun ai.
Jinghpaw Mungdaw Dingchyai Hkyeng Hpung ni hte Hpakant Wan Sat Dap ni pawng nna, December shata 23 ya shani Hpakant Maw-wan Kaji kaw lung seng htu tam nga ai ten, ga shingbut gyi bun nna kaput lawm mat ai masha marai 4 a moimang hpe ladat amyu myu shaw nna tam garum ai hta shang lawm nga ai rai nna, December shata 26 ya shani hta gaw, masha marai 3 a moimang hpe mu tam shaw la sai lam, ngam nga ai marai 1 a moimang hpe mung naw matut tam nga ai lam na chye lu ai.
Jinghpaw Mungdaw Dingchyai Hkyeng Hpung hta, masha amyu wuhpung wuhpawng makam masham n ging hka ai yawng shang lawm mai ai rai nna, masha galaw ai hpyen, shingra maka hpyen a majaw ru yak jam jau hkrum wa ai ni yawng hpe garum ningtum jaw nga ai wuhpung wuhpawng langai re lam chye lu ai.
Photo Credit; Mrcs Kachin
