Jinghpaw Mungdaw masat nhtoi lamang galaw na matu hkyen lajang nga
(73) ning hpring Jinghpaw Mungdaw masat nhtoi akyu hpyi chyeju shakawn lamang hpe Kamaing Ginwang Htunghking Komiti ni hte Kamaing Hkristan Kongsi ni ta gindun nna, du wa na January shata 10 ya jahpawt hkying 10:00am aten hta, Kamaing Muklum, Kawng Ra lawk (3), Manau Wang Sut Ngai Htingnu kaw galaw na matu hkyen shajin nga ai lam na chye lu ai.
Anhte a Mungdaw masat nhtoi hpe yawng myit dum nga na matu hte Jinghpaw Wunpawng amyu sha ni yawng myit hkrum kahkyin gumdin nga na matu yaw shada let galaw ai re lam, Kamaing Kawng Ra Buga Hpung kaw na Rev. Maran Seng Awng tsun ai.
“Mungdaw masat nhtoi re hpe yawng myit dum nga na matu rai ga ai. Anhte myit hkrum mang rum ai lam hpe hkam la lu na matu re. 2020 ning hta kap bra ana a majaw Mungkan ting hkrit tsang nga ra tim mung, 2021 ning hta gaw Karai Kasang a chyeju ningnan hkam la lu u ga matu yaw shada ai” nga nna tsun ai.
COVID-19 ana zinli byin nga ai aten ladaw re majaw, Jinghpaw Mungdaw masat nhtoi lamang hpe Kamaing ginra kata mare kahtawng shagu na lit nga ai salang ni marai 50 grup yin shang lawm ai hte galaw sa wa na rai nna, jahpawt hkying 7:00am aten hta gaw, Myu Sha Dawnghkawn sharawt hkungga jaw ai akyu hpyi lamang galaw na matu hkyen lajang da ai lam na chye lu ai.
