Jinghpaw Wunpawng Htunghking rida maka hpe njaw n ang ai hku bu hpun sumraw ai ni, htunghking tara hte maren ahkyak la sa wa na
Jinghpaw Wunpawng Htunghking hte Laili Laika hpung Ginjaw (JHG) kaw nna jinghpaw wunpawng myusha ni a rida maka bu hpun mawn sumli lai ladat ni hpe njaw n ang ai hku jai lang bu hpun ai ni yawng hpe htunghking tara hte hkrak, ahkyak la sa wa na re lam chye lu ai.
Social Media facebook ntsa hkan e jinghpaw wunpawng myusha ni a bu hpun sumraw ai ladat, la labu dang pai kaw num rida maka shakap ai ladat ni, Designer soi ai ni mung htunghking jahten ai hku re wa ai majaw jinghpaw wunpawng myusha ni a htunghking maka hpe anhte nan manu shadan sa wa lu na matu yaw shada let seng ang ai jinghpaw mung asuya hte bawng ban jahkrup la nna ta tut galaw sa wa ai re lam JHG kaw nna chye lu ai.
Jinghpaw rida maka hpe njaw n ang ai hku jai jang ai ladat, htunghking hpe jahten ai ladat ni hpe ahkyak la sa wa lu na matu seng ang ai asuya hte tau nau jahkrup bawng ban ai lam re.
“Ndai lam ni hte seng nna anhte mu chye wa lu ai ten hta Shawng nnan gaw n gup aga hte shawng sadi jaw sa wa na re. Dai hta nhkan sa ai rai yang gaw second step hku nna htunghking tara nga ai hte maren htunghking kaw nna tara jawat, ahkyak la sa wa na re” nga nna JHG ningbaw Du Wa Htingnan Yaw Sam tsun ai.
Matut nna mung htunghking bu hpung sumraw ai ladat hte seng ai machye machyang jaw ai wunkat ni, shadum jahprang ai lam ni hpe galaw sa wa na re.
JHG kaw nna sawk sagawn mazing da lu ai jinghpaw wunpawng htung hking rida maka 60 jan nga ai rai nna ndai rida maka ni hpe jinghpaw mung kaw sha nrai, mungkan de du hkra anhte jinghpaw wunpawng myusha ni a rida maka re ngu tsun dan lu hkra register galaw sa wa na, ra nga ai rida maka ni hpe mung matut sagawn mazing nga dingyang re lam chye lu ai.
“ Ya daini anhte amyu langai nga pra galu kaba sa wa lu na matu gaw labau htunghking gaw grai ahkyak ai re. Anhte maka hpe anhte makawp maga sa wa ra sai. Myu langai a Identity hpe jawm makawp maga na gaw Jinghpaw Wunpawng Htunghking hte Laili laika hpung Ginjaw a lit sha nre, jinghpaw wunpawng myusha ni yawng a lit re. Anhte yawng jawm makawp yang she anhte a htunghking maka ni gaw nmat na re, anhte a htunghking hpe anhte wunpawng myusha ni yawng makawp maga sa wa ga” nga nna Du Wa Htingnan Yaw Sam kaw nna shatsam mungga tsun da ai.
Ndai hkrum zup bawng ban hpawng hta JHG myu shayi ningbaw Lashi Hka Dim hte Kit hkai Hpu awn Sara Zuk Daw Tsawm naw yan woi awn nna Jinghpaw Mung Asuya lit hkam ( ) hte rau asuya rung hta hkrum zup bawng ban la lu sai re.
