JLH jawngma ni, htunghking hte shachyen shaga ai lam sharin hpawng lamang galaw na
Photo Credit; JLH Dakkasu Ni Ginjaw
Jinghpaw Wunpawng Laili Laika hte Htunghking Hpung Dakkasu ni Ginjaw kaw nna woi awn nhtawm, November shata praw 6 ya shani hta htunghking hte shachyen shaga ai lam sharin lamang hpe Zoom Cloud Meeting ladat hte wunpawng ramma ni hpe sharin ya na re lam chye lu ai.
Sharin hpawng hta Rev. Marip Bawk San kaw nna madung lit la sharin ya na re hte, shachyen shaga ai lam, Htunghking hte seng ai machye machyang ni, wunpawng myu sha ni kata hta byin nga ai amying shingteng shamying ai mang hkang ni hte seng ai lam ni hpe ningmu jahpaw tsun dan mat wa na re.
“Yaw shada tawn ai hpan lahkawng nga ga ai re. shawng nnan gaw JLH kaw apnawng taw ai komitti malawm ni hpe madung yaw shada let sharin sa wa ai re hte ndai lawng lam ni hpe myit lawm ai wunpawng ramma kadai raitim mung shang lawm hkaja mai na matu ngu yaw shada let ndai lamang hpe galaw sa wa ai re lam” JLH Ginjaw Amu Madu Krawn Naw Awng tsun dan ai.
“Ya daini tatut hta anhte jinghpaw wunpawng ramma ni gaw htunghking ningli hte seng ai lam hta gawng kya ai lam ni nga ai. Shachyen shaga ai lam, labau hte seng ai lam ni hpe nchye ai lam, manu shadan ai lam ni hta gawng kya wa ai lam ni nga ai re majaw ndai lam ni hpe manu shadan chye ra nga ai” nga nna Krawn Naw Awng matut tsun ai.
shawng ningnan lang hku nna Zoom Cloud meeting ladat hte galaw ai rai nhtawm, kaga ga baw ni hte ramma ni hpe ningmu jahpaw ai lamang ni, masha zuphpawng lu na ahkaw ahkang lu ai aten hta wunpawng ramma ni a matu htunghking hte seng ai zuphpawng kaba ni hpe hkyen lajang da ai masing ni mung nga ai re.
Jinghpaw Wunpawng Laili Laika hte Htunghking Hpung Dakkasu ni Ginjaw kaw nna woi awn ai htunghking hte shachyen shaga ai lamang hta Htunghking labau hte seng nna myit lawm ai Jinghpaw wupawng ramma ni, wunpawng myusha ni kadai raitim mung shang lawm hka ja mai ai, madat mai ai lam JLH kaw nna tang madun da ai re.
