July (15) ya shani du hkra nhtoi bai jat masat

COVID-19 Ana Zinli Makawp Ninghkap Komiti kaw nna COVID-19 ana zinli makawp ninghkap gasat lam tara matut hkan nang hkan sa sha ngang shakang na aten hpe July shata (15) ya shani du hkra aten bai jat masat sai lam, ndau shana laika kaw na chye lu ai.

KIO uphkang ginra kata shanu nga ai mungchying mungshawa hte magam gun ni yawng hpe Ginjaw COVID-19 Ana Zinli Makawp Ninghkap Komiti kaw nna matsun shapraw da ai ana zinli makawp tara ni hpe hkan sa shatup na matu, 2020 ning, June shata (30) ya shani du hkra masat ai lam nga sai re.

June shata (25) ya shani na Ginjaw Komiti zuphpawng a dawdan minute hte maren, COVID-19 ana zinli makawp ninghkap bungli masing hkrang shapraw sa wa na hte tara ni hpe dingyang hkan sa shatup lu na matu, July shata (15) ya shani du hkra ninghtoi bai htawt sit masat dat ai lam re majaw, KIO uphkang ginra kata shanu nga ai mungchying mungshawa hte magam gun yawng hpe chye na hkawn hkrang hkra tsun hpaji jaw sa wa lu na hte lawu tsang komiti ni shawoi galaw dingyang rai nga ai bungli masing ni hpe matut galaw sa wa lu na matu, COVID-19 ana zinli makawp ninghkap bungli masing tara hte seng nna gram sharai ai lam ni nga wa yang mung, matut nna matsun sa wa na re lam chye lu ai.

Myen Mung Asuya kaw nna mung COVID-19 ana makawp ninghkap bungli masing hpe matut galaw sa wa lu na matu, July shata (15) ya shani du hkra nhtoi bai jat masat da ai re lam, June shata 27 ya shani ndau da ai kaw na chye lu ai.