Junia Hight ramma ni hpe nanghpam lu sha ninghkap ningmu jahpaw hpawng galaw
Junia Hight ramma ni hpe nanghpam lu sha ninghkap ningmu jahpaw sharin hpawng hpe, January shata 14 ya jahpawt hkying 10:00am aten kaw nna, shana de hkying 3:00pm aten du hkra, Kamaing mare buga kaw galaw la lu sai lam chye lu ai.
Sharin hpawng hpe Kamaing Rap, KBC pat jasan komiti ni kaw nna, “Ka-ni nanghpam hpe ninghkap let, amyu mungdan hpe gaw gap ga” ngu ai ga baw kata kaw woi awn galaw ai rai nga ai.
Sharin hpawng galaw ai a yaw shada lam hpe Kamaing Rap Amu Madu, Rev. Maran Sin Ram tsun ai hta “Anhte Kaimaing rap kata hta ya kaba wa ai ramma ni nanghpam lu sha hpe koi yen lu na matu hte nanghpam malu masha hta nhkrat sum mat na matu re” nga nna tsun ai.
Ndai sharin hpawng hta Myitkyina Ginwang Hkalup Hpung Pat Jasan Hpa-awn Rev. Dr. Maji La Wawm sa du sharin ya ai rai nna, Kamaing rap kata na ramma ni yawng marai 250 daram sa du sharin hkam la sai lam, Sara matut tsun ai.
Sharin hpawng hpe laning mi hta kalang galaw sa wa na lam nga ai rai nna, Kamaing Rap, kata hta Kamaing Buga, Kawng-ra Buga, Lainawng Buga, Gauri Buga hte Zi-un Manden Buga ni re lam chye lu ai.
