Ka-ni lu sha ai masha marai 42 hte Ka-ni dut sha ai masha marai 2 hpe lu rim

Mawwan Kaji Ka-ni Nanghpam Pat Jasan Hpung ni kaw nna Pat Jasan Bungli shang ai hta February shata 18 ya jahpawt hkying 7:30am aten hta Ka Lajawng mare baw Moe Ga Te mare kaw Ka-ni lu sha ai masha marai 42 hte Ka-ni dut sha ai masha marai 2 hpe rim lu la ai lam na chye lu ai.

Ka-ni dut sha ai Salang Nawhkrai Ja Yaw kaw na Ya Ma tawng 422 lu rim la lu ai rai nna, Ya Ma tawng 100 hpe namdum kaw makoi nna dut sha ai re lam, U Nay Lin Htun kaw na gaw Ka-ni hpraw shawk Ti Se Pya Bu 5 lu rim ai re hpe chye lu ai.

Ka-ni lu sha ai masha ni hpe gaw ningmu jahpaw hkaw tsun sharin shaga ai lam galaw nna bai dat ya sai rai nna, Ka-ni lu sha ai Shadang Gum Ja Awng hte Shadang Sinwa Naw yan hpe gaw dawn dabang de sa da sai lam, ndai Ka-ni lu sha ai masha ni hta tsang 8 jawngma 2 mung lawm ai re hte Ka-ni dut sha ai yan hpe maw kata kaw na gawt shapraw kau sai re lam, Mawwan Kaji Ka-ni Nanghpam Pat Jasan Hpung ni shana wa ai kaw na chye lu ai.

Mawwan Kaji Ka-ni Nanghpam Pat Jasan Hpung ni kaw nna February shata 15 ya shana maga hkying 3:30pm aten hta mung Ka Lajawng mare baw Moe Ga Te mare kata kaw sha Ka-ni lu sha ai masha 44 hte Ka-ni dut garan ya ai masha marai 3 hpe lu rim la ai re lam chye lu ai.