Wunpawng Mungdan Shanglawt Asuya, Ginwang Ginjaw shagu hta ka-ni nanghpam ninghkap masat ninghtoi (Kachin Anti Drug Day D.Day) hpawng lamang hpe galaw ai lam chye lu ai.

April shata 25 ya shani ang ai, Kachin Anti Drug Day D.Day hpawng lamang hpe Ginwang Ginjaw shagu kaw galaw ai hta Wunpawng amyu sha ka-ni nanghpam pat jasan masing jum hpajang komiti ningbaw a, mungga madat hkamla ai lam galaw ai re.

Matut nna Ginwang Ginjaw nkau hta ka-ni nanghpam ninghkap lam hkawm shawa n-gun madun ai lam, rim ahkyak la da lu ai ka-ni nanghpam ni hpe mungshawa a man kaw wan nat jahten ai lam hte ginsup lamang ni hpe mung galaw ai re lam chye lu ai.

Ya aten ka-ni nanghpam pat jasan masing hpe Wunpawng amyu sha yawng, Magam Dap, Makan Dap shagu hte nawku hpung shagu hta mung ninghkap gasat nga ai re.