Kachin Amyu Shayi ni a hkrumzup bawngban hpawng galaw

April 29 ya shani Waimaw Muklum Lahov Laili Laika hte Htunghking Gawknu hta Kachin Women Union ( KWU ) ni woi awn nna, Kachin Amyu shayi ni a hkrumzup bawngban

hpawng galaw ai lam hpe chye lu ai.

Ndai zuphpawng galaw ai a yaw shada lam hpe, Kachin Women Union a program management hpe lit la nga ai saranum Sut Seng Htoi tsun ai gaw, “Amyu bawsang kata sumprat dawk ai lam ni nga wa ai majaw, Amyu bawsang shada manghkang byin wa ai lam ni nnga hkra, Amyu bawsang nsen langai shale lu na matu re” nga tsun ai.

Zuphpawng hta bawngban ai lam hpe saranum Sut Seng Htoi matut tsun ai hta “Madung hku na gaw, ya yang na simsa lam hta amyu shayi ni a shanglawm lam, mare buga ginra ni hta amyu shayi ni shakut shaja ra ai lam, Wunpawng Amyu Shayi ni galaw nga ai simsa lam hte mungmasa lam yan ni hta woi ningshawng ai shara ni kaw shanglawm lu na matu hpa majaw ahkyak ai ngu ai lam ni hpe bawngban re” nga tsun ai.

Daini galaw ai Kachin Amyu Shayi ni a hkrumzup bawngban hpawng hta du sa ai masha yawng marai  ( 300  ) jan re lam mung na chye lu ai.

Kachin Women Union ( KWU ) hpe laiwa sai 2011 ning February shata hta saranum kaba Ja Seng Hkawn woi awn hpaw hpang wa ai re hpe chye lu ai.