Kachin Develoment Group (KDG) kawn Gaw Ningja hte seng ai lam hpe bawngban hpawng woi galaw
Kachin Develoment Group (KDG) kawn woi awn nhtawm, Laiza Hotel kaw January shata 20 ya shani hkying 9:00am aten kaw nna shana daw hkying 5:00pm aten du hkra Gaw Ningja hte seng ai bawngban hpawng hpe woi awn galaw ai lam chye lu ai.
Ndai bawngban hpawng woi galaw ai lam gaw, KDG a gaw ningja ni hpe woi zinlum ai project langai rai nna, gaw ningja ni hpe woi zinlum let, gaw ningja ni shinggyim wuhpawng kata de grau nna shanglawm sa wa lu na matu re lam KDG na Saranum Damau Ja Awng tsun ai.
Bawngban hpawng hta dabang kaw gaw ningja ni hpe woi zin lum ai lam, gaw ningja ni shada da zinlum hkat ai lam, group kata hpabaw magam bungli ni galaw taw ai, laiwa sai ten hta hpabaw ni galaw ai, matut nna hpabaw ni galaw sa wa na lam, dabang kata na gaw ningja masha ni gara hku mahkri shawn nna bungli galaw sa wa na ngu ai lam ni hpe bawngban ai re hpe chye lu ai.
KDG a projet 8 nga ai hta na projet 1 rai nga ai, gaw ningja ni hpe woi zinlum ai lam galaw ai rai nhtawm, Je Yang, Hpun Lum Yang, Pa Jau, Woi Chyai, Sha-it Yang, Mung Seng Yang, Laiza, Ja Htu Kawng ni kaw madung dat nna galaw nga ai magam bungli re hte bawngban hpawng hta Dabang shagu de na gawng malai marai 17 sa du shang lawm ai lam chye lu ai.
