Kachin Mungshawa ni hte Kachin Mung Masa Pati ni a hkrum zup bawngban hpawng galaw
Myitkyina Muklum, Manau Wang Majoi Gawknu kaw Wunpawng Amyu Sha Mung Bawng Rapdaw ( WMR ) kawn lit la woi awn nna Kachin Mungshawa ni hte Kachin Mung Masa Pati ni a hkrum zup bawngban hpawng hpe April praw, 10 ya jahpawt hkying 9:00am aten kawn shana  hkying 7:00pm aten du hkra galaw ai lam chye lu ai.
Hpawng hpe MCC kawn akyu hpyi hpang ya ai hte Rev.Dr.Hkalam Sam Sun kaw nna Mungga shaga ya ai. Wunpawng Mung Masa Pati langai hpaw sa wa na hta Kachin Pati ( KSDP, KDP, KNC ) ni hte UDPKS na Duwa Hkyet Hting Nan ni gaw myit hkrum letmat ta masat htu shagrin la lu sai rai nhtawm, hpaw ninghtan sa wa na Pati nnan a Working Komiti hpe WMR hku na tang matsun galaw sa wa na re lam chye lu ai.
Bawng ban jahkrup ai aten grai galu wa ai hte shawa masha ka-ang hkup jan Zuphpawng kaw na pru mat wa ai majaw Pati nnan mying, Logo hte Dawng Hkawn ni hpe shagrin la lu ai lam nnga shi ai hpe chye lu ai.
Zuhpawng hta du sa ai masha hte shabyin shatai ni yawng marai 791 re lam na chye lu ai.
