Kachin State People’s Party ( KSPP ) ni rung hpaw akyu hpyi hpawng galaw
Hpakant Muklum kata kaw July shata praw 4 ya jahpawt 7:00am aten kaw nna shani ka-ang hkying 12:00pm aten laman hta Kachin State People’s Party ( KSPP ) ni a Dawnghkawng, pyen dau sharawt hte rung hpaw akyu hpyi hpawng lamang galaw ai lam chye lu ai.
Hpawng lamang hta nawku hpung shagu na hpung up, hpung sara ni hte Wa Jau ni kaw nna akyu hpyi shaman ya ai lam galaw ai rai nna, KSPP party a ningbaw magam lit hpe gan lit la gun hpai nga ai Dr. Manam Tu Ja kaw nna, party a policy hte shawnglam hta galaw sa wa na magam bungli ni hpe tsun dan ai.
Matut nna KSPP ginjaw party dinggrin salang mung rai, Public relationship mung rai Sara Myitung Brang Awng kaw nna mung, Federal lu wa ai shaloi Mungdaw a gawda ai tara hpe gara hku ka ra ai, gara hku ka taw ai ngu ai lam ni hpe tsun sanglang dan ai lam chye lu ai.
“KSPP party gaw mungshawa a ga hpe madat ai, Jinghpaw Mungdaw a mungshawa party hpe hpaw shabawn mat wa ai, mungshawa ra ai party re ngu ai lachyum hpe shapraw nna daini anhte gaw, ginwang shagu, muklum shagu rung hpaw poi hpe galaw ai lam re” nga nna Sara Myitung Brang Awng tsun ai.
Rung hpaw poi lamang hta mungshawa kanu kawa ni, nawku hpung woi sara ni, Wunpawng Amyusha Zinlum Hpung na kanu kawa myitsu ni hte Sut Du lauban yawng marai 100 jan sa du shang lawm ai lam na chye lu ai.
